Një ngjarje e rëndë që tronditi gjithë Kosovën raportohet të ketë ndodhur tri ditë më parë në Prishtinë. Sipas një njoftimi të Policisë së Kosovës, një femër, që tashmë është mësuar se është një vajzë vetëm 11 vjeçe, është dhunuar nga pesë persona.
Sipas raportit 24 orësh të policisë, thuhet se rasti ka ndodhur të shtunën rreth orës 17:30 dhe ka vazhduar deri në orët e mesnatës, raporton KosovaNews.
Nuk ka ditë që në raportin e Policisë e Kosovës nuk gjen raportime për dhunë fizike, psikike e seksuale ndaj grave. Por, dje (të hënën) shoqëria kosovare u trondit nga dhunimi që iu bë një të miture të në një park në Prishtinë nga pesë persona, disa të mitur e disa tjerë të moshës së rritur.
Në njoftimin e fundit të Policisë së Kosovës bëhet e ditur katër të dyshuar janë arrestuar, ndërsa janë në kërkim të personit të pestë.
Policia: Katër të arrestuar, jemi në kërkim të personit të pestë
Policia e Kosovës në njoftimin për media ka bërë të ditur se lidhur me rastin e dhunimit deri në këtë fazë ka arrestuar gjithsej katër persona, ndërkaq personi i pestë është identifikuar dhe është kërkuar në shtëpinë e tij por nuk është gjetur në shtëpi.
Policia e Kosovës njofton se i njëjti ndodhet në kërkim policor.
Në raportin paraprak të Policisë, është bërë e ditur se viktima është dërguar në strehimore dhe organet shtetërore po merren me trajtimin e saj.
Një muaj paraburgim ndaj dy personave që dyshohen për dhunim
Gjykata Themelore në Prishtinë – Departamenti për Krime të Rënda dhe Departamenti për të Mitur kanë vendosur lidhur me kërkesat e Prokurorisë Themelore në Prishtinë për caktimin e masës së paraburgimit kundër të pandehurit E.R dhe të miturit G.R për shkak të dyshimit të bazuar se kanë kryer veprën penale “Dhunimi”.
Gjyqtarët e procedurës paraprake kërkesën e Prokurorisë për caktimin e masës së paraburgimit kundër të pandehurit E.R dhe të miturit G.R e kanë aprovuar si të bazuar dhe të njëjtëve iu kanë caktuar masën e paraburgimit në kohëzgjatje prej një muaji për secilin veç e veç.
“Me rastin e caktimit të paraburgimit, Gjykata ka marrë parasysh peshën e rëndë të veprës penale, mënyra dhe rrethanat në të cilat është kryer vepra penale ku dyshohet se është kryer ndaj viktimës së ndjeshme – e mitur dhe me lënien në liri të të pandehurit dhe të miturit, ekziston rreziku i ikjes, me qëllim të shmangies nga përgjegjësia penale, ekziston rreziku që të njëjtit do t’i asgjësojnë, fshehin, ndryshojnë apo edhe të falsifikojnë provat e veprës penale, ndikimit në të dëmtuarën dhe në dëshmitarë andaj masa e paraburgimit tani për tani është e vetmja masë preventive që do të parandaloj të njëjtit në përsëritjen e veprës penale të njëjtë apo të ngjashme”, thuhet në njoftim.
Personat e arrestuar dyshohet se të shtunën nga ora 17:30 deri në orën 00:30 kanë dhunuar një të mitur.
Dosja e Prokurorisë: 11-vjeçarja u dhunua në park përderisa ishte duke ecur
Në një park të kryeqytetit një vajzë e re 11-vjeçare përderisa ishte duke ecur ishte ndaluar e pastaj dhunuar seksualisht nga disa persona.
Kështu përshkruhet në dosjen e prokurorisë të cilën e ka siguruar kallxo.com. Ngjarja e rëndë pretendohet të ketë ndodhur pasi tre persona e kishin ndalur 11-vjeçaren e cila ishte duke ecur.
Të tre personat ishin afruar tek e mitura dhe e kishin ngacmuar me fjalët “Zemër po më pëlqen”, përderisa njëri nga të dyshuarit kishte filluar ta prek me dorë në pjesën e barkut dhe në fundin e shpinës.
Dosja e organit ndjekës tregon se të dyshuarit ia kishin hequr të miturës rrobat në park. Pasi e kishin zhveshur, në dosje përshkruhet se njëri nga të dyshuarit po ia mbante duart dhe gojën viktimës ndërsa tjetri po e dhunonte seksualisht.
Sipas përshkrimit të prokurorisë dhunimi kishte vazhduar dhe ai i cili ia mbante duart, pastaj kishte filluar ta dhunojë seksualisht.
Pasi ishte dhunuar nga dy të dyshuarit e parë, viktima në afërsi të shtëpisë së saj ishte ndalur edhe nga një person tjetër.
Ai e kishte futur 11-vjeçaren në veturë së bashku me tre persona të tjerë dhe e kishte dërguar në një vend ku kishte vetëm pemë dhe bari.
Aty përshkruhet se viktima ishte dhunuar sërish.
Përdhunimi që tronditi Kosovën, reagime të ashpra nga politika e shoqëria civile
Presidentja Vjosa Osmani, dhunimin e 11-vjeçares e ka konsideruar akt çnjerëzor.
“Me ashpërsinë dhe vendosmërinë më të madhe duhet ta përsërisim njëzëri se askush s’është mbi ligjin. Ligji duhet të jetë i ashpër me secilin keqbërës të tillë, e posaçërisht në rastet sikur ky kur cak i dhunimit janë fëmijët”, ka shkruar Osmani.
Kryeministri Albin Kurti nga organet e rendit ka kërkuar që të vënë para drejtësisë personat e dyshuar.
“Kërkoj nga organet e rendit dhe të hetuesisë që të vënë personat e dyshuar sa më shpejtë para drejtësisë, e që kryerësit të marrin dënimin meritor për këtë vepër kaq të rëndë e tronditëse, të dënueshme e të papranueshme”, ka shkruar ai.
Kryetari i Prishtinës, Përparim Rama është shprehur i tronditur nga rasti.
“Nuk u abuzua vetëm një fëmijë, u turpëruam të gjithë ne si shoqëri! Prandaj, si Kryetar i Kryeqytetit, zotohem se do të punojmë për ndërtimin e mekanizmave që rrisin bashkëpunimin mes komunitetit dhe organeve të rendit, në mënyrë që bashkë t’i parandalojmë rastet e tilla dhe të ofrojmë mbështetje për të gjithë viktimat”, tha Rama.
Nesër protestohet në Prtishtinë
E për rastin e rëndë në Prishtinë është paralajmëruar edhe protestë.
Kolektivi për Mendim dhe Veprim Feminist ka njoftuar se të mërkurën do të protestojnë dhe kanë tri kërkesa.
Protesta do të nisë në orën 12:00 te sheshi “Zahir Pajaziti”. Ndërsa, aty do të kërkohet mbrojtje dhe siguri nga shteti për vajzat dhe gratë, trajtim të drejtë të rasteve të dhunës ndaj grave dhe dënime meritore për dhunuesit, si dhe legalizimin e përdorimit dhe shpërndarjen e gazit irritues për vetëmbrojtje (pepper spray).
Eugen Cakolli nga KDI ka thënë se liderët politikë është dashur të reagojnë më moti për fenomenin e përdhunimeve.
“Rastet e sulmeve dhe dhunës ndaj vajzave e grave janë rritur eksponencialisht sepse asnjë institucion qysh moti s’po e kryen punën si duhet për t’a ndërprerë këtë fenomen. Dënimet qesharake e trajtimi joserioz i këtij problemi, veç i ka ‘trimëruar’ kriminelët’, ka shkruar Cakolli.
Reagimi i ministres Albulena Haxhiu
Lidhur me këtë, ministrja e Drejtësisë, Albulena Haxhiu, në mënyrë indirekte ka fajësuar prokurorinë dhe gjykatat duke lënë të kuptohet se nuk po e kryejnë punen si duhet edhe pse i kanë pagat më të larta në rajon.
Ajo ka publikuar disa statistika ku ka thënë se më shumë ka parashkrime të këtyre lëndëve sesa dënim me burgim.
E për këtë, Haxhiu ka thënë se situata nuk mund të ndryshojë nëse zyrtarët përgjegjës nuk e marrin ndëshkimin për mosveprim e neglizhencë dhe nëse këto raste nuk trajtohen me prioritet.
