Zëvendëskryeministri dhe ministri i Punëve të Jashtme të Kosovës, Glauk Konjufca ka thënë se Shtetet e Bashkuara të Amerikës janë aleati kryesor dhe partner i pazëvendësueshëm.
Ai kështu është shprehur pas takimit me senatorin amerikan Keith Self, Kryetar i Nënkomisionit për Evropën në Komitetin për Punë të Jashtme të Dhomës së Përfaqësuesve të SHBA-së.
Konjufca ka falënderuar senatorin Self për mbështetjen ndaj Kosovës dhe iniciativën në mbështetje të anëtarësimit në NATO si dhe adresimin institucional sa i përket çështjes së shqiptarëve në Luginën e Preshevës.
“Në veçanti, falënderova Kongresmenin Self, një mik i dëshmuar i Kosovës, për angazhimin e tij personal dhe të vazhdueshëm ndaj vendit tonë, përfshirë iniciativat në Kongresin amerikan që mbështesin anëtarësimin e Kosovës në NATO dhe adresimin institucional të çështjes së të drejtave të shqiptarëve në Preshevë, Bujanoc dhe Medvegjë. Shpreha gjithashtu gatishmërinë time për ta thelluar edhe më tej këtë bashkëpunim. Për Kosovën, Shtetet e Bashkuara të Amerikës nuk janë vetëm aleati ynë kryesor strategjik, por një partner i pazëvendësueshëm historik, me të cilin ndajmë vlera, besim dhe një lidhje të veçantë që do të qëndrojë e fortë brez pas brezi”, ka shkruar Konjufca.
Senatorët amerikanë Keith Self dhe Suhas Subramanyam gjatë ditës janë pritur në takim edhe nga kryeministri në detyrë.
Ata të martën ishin për vizitë në Luginën e Preshevës.
Pas vizitës atje, Self tha se kanë vërejtur se ka probleme reale mes shqiptarëve dhe Serbisë.
