Kandidatët e Lëvizjes Vetëvendosje për deputetë, bashkë me kryeministrin Albin Kurti, gjatë ditës së djeshme vizituan familjen e dëshmorit Idriz Gucati në Prizren, raporton KosovaNews.
Pas këtij takimi, kandidati Mytaher Haskuka, i cili mban numrin 50 në listë, u ndal te rëndësia jetike që ka vazhdimi i avancimit të mbrojtjes dhe Ushtrisë së Kosovës për sigurinë e vendit.
Përmes një postimi në Facebook, Haskuka bëri të ditur se u pritën nga bashkëshorjtja dhe fëmijët e dëshmorit, të cilët ndanë rrëfime për momentet e fundit të jetës së tij.
Haskuka ka shkruar se edhe pse i plagosur rëndë, Idriz Gucati nuk kishte pranuar të tërhiqej nga beteja, por kishte kërkuar që bashkëluftëtarët të merrnin armën e tij dhe të vazhdonin luftën.
“Kur bashkëluftëtarët shkuan për ta tërhequr, ai nuk pranoi, por kërkoi prej tyre që ta merrnin pushkomitralozin, ndërsa ai vazhdoi betejën deri në frymën e fundit”, ka shkruar Haskuka.
Ai theksoi se sakrifica e dëshmorëve si Gucati mbetet udhërrëfyes për institucionet e vendit, duke shtuar se, për të shmangur konflikte të reja, Kosova duhet të vazhdojë investimin në një ushtri moderne dhe në përfshirjen e të rinjve në radhët e saj.
“Pikërisht për të parandaluar luftëra të reja, do të vazhdojmë forcimin e ushtrisë sonë, me armatim modern dhe ushtarë të rinj, ashtu që amaneti i dëshmorëve të realizohet”, ka theksuar Haskuka.
