Përfaqësuesi i Lartë për Politikë të Jashtme dhe Siguri të BE-së, Josep Borrell, shprehu besimin se është e mundur që të zgjidhet problemi në lidhje me targat ndërmjet Kosovës e Serbisë.
Në një intervistë për transmetuesin publik austriak ORF, Josep Borrell theksoi se paqja në këtë rajon është shumë e brishtë, por se marrëveshja për lirinë e lëvizjes, sipas tij, është një hap pozitiv.
“Ne operojmë në modalitetin e parandalimit të krizave”, deklaroi Borrell në këtë intervistë për ORF-në.
“Kriza mund të kishte shpërthyer më 1 shtator nëse nuk do të kishim arritur një marrëveshje për kalim të kufijve… Ky është një lajm i mirë” ”, theksoi Borrell.
Më tej, shefi i BE-së për Politikë të Jashtme e Siguri, deklaroi se çështja për tabelat e automjeteve mbetet ende e hapur.
“Por, jam i bindur se ne mund ta zgjidhim edhe këtë,” tha Borrell.
Në kuadër të dialogut të ndërmjetësuar nga BE-ja, Serbia është pajtuar që të heqë dorë nga aplikimi i dhënies së një dokumenti shtesë për shtetasit e Kosovës, me rastin e hyrjes në Serbi, veprim që nuk do ta aplikojë as Kosova për ata që hyjnë në Kosovë e që bartin dokumente të Serbisë.
Njoftimin për një marrëveshje të tillë e dha vetë shefi i BE-së, për Politikë të jashtme e Siguri, Josep Borrell.
Kosova dhe Serbia më 27 gusht kanë arritur marrëveshje për heqjen dorë nga lëshimi i dokumenteve për hyrje-dalje për shtetasit e dy shteteve.
Kjo marrëveshje nënkupton se qytetarët e Serbisë dhe ata të Kosovës, do të mund të kalojnë kufirin me kartat e tyre të identitetit, pa pasur nevojë që të pajisen me një letër shtesë të hyrje-daljes. Këtë praktikë Serbia e kishte aplikuar qe 11 vjet, ndërkaq Kosova lëshoi dokumente të tilla për disa orë gjatë 1 gushtit.
Dy vendimet – për targat dhe dokumentet serbe – rritën tensionet midis Kosovës dhe Serbisë, që kulmuan me vendosjen e barrikadave në veri të Kosovës nga serbët lokalë më 31 korrik dhe 1 gusht. Barrikadat u hoqën dhe Qeveria e Kosovës u zotua për shtyrjen e zbatimit të vendimeve.
Por, pas një rundi të pasuksesshëm të dialogut, zyrtarët evropianë dhe ata amerikanë shtuan përpjekjet për të bindur palët që të arrinin ujdi. Në këto përpjekje u angazhua edhe i dërguari i Shteteve të Bashkuara për Ballkanin Perëndimor, Gabriel Escobar.
Ai së bashku me të dërguarin e BE-së për dialogut, Mirosllav Lajçak, këtë javë vizituan Kosovën dhe Serbinë për t’u siguruar që nuk do të ketë dhunë më 1 shtator, kur parashihej të hynte në fuqi vendimi për dokumentet.
