Ish-mbrojtësi i Italisë, Leonardo Bonucci, ka bërë thirrje për ndryshime të mëdha në futbollin italian pas dështimit të fundit për kualifikim në Kupën e Botës, duke sugjeruar edhe emrin e Pep Guardiola si trajner të mundshëm.
Bonucci ka thënë se nëse ekziston një dëshirë e vërtetë për të nisur nga e para, atëherë një emër si Guardiola do të sillte një rishikim të plotë të sistemit. “Është shumë e vështirë, por të ëndërrosh nuk kushton asgjë”, është shprehur ai.
Sipas tij, problemi kryesor i futbollit italian nuk është mungesa e talentit, por nevoja për rindërtim nga themelet dhe për më shumë guxim në mënyrën e lojës. Ai ka thënë se Italia tradicionalisht është mbështetur te mbrojtja, por tashmë ka lojtarë cilësorë që duhet të lejohen të shprehen në fushë.
Bonucci ka vlerësuar se skuadra aktuale ka më shumë talent teknik krahasuar me ekipin që fitoi Euro 2020, por i mungon lidershipi dhe personaliteti në ndeshjet vendimtare.
Ai ka përmendur disa nga lojtarët kryesorë që duhet të jenë baza e së ardhmes së Italisë, si Gianluigi Donnarumma, Sandro Tonali, Alessandro Bastoni, Riccardo Calafiori, Francesco Pio Esposito dhe Gianluca Scamacca.
Bonucci është shprehur se prioritet duhet të jetë përgatitja sa më e mirë fizike dhe mendore e këtyre lojtarëve, në mënyrë që Italia të rikthehet në nivelin më të lartë ndërkombëtar.
