Kryeministri i Kosovës, Albin Kurti, me rastin e Ditës së Kushtetutës ka theksuar rëndësinë e aktit më të lartë juridik në vend, duke e cilësuar atë si bazë të funksionimit demokratik dhe garantuese të të drejtave të qytetarëve.
“Sot, në Ditën e Kushtetutës, rikujtojmë aktin themeltar që normon vullnetin dhe të drejtat e qytetarëve për një shtet të pavarur e të lirë, demokratik dhe të barabartë”, ka deklaruar Kurti.
Ai ka nënvizuar se Kushtetuta e Republikës së Kosovës përbën bazën juridike të institucioneve dhe garanton funksionimin e tyre në shërbim të qytetarëve dhe interesit publik, në frymën e sovranitetit shtetëror.
Sipas tij, Kushtetuta orienton vendimmarrjen politike dhe përcakton standardet e veprimeve, duke kërkuar përkushtim të vazhdueshëm nga të gjithë bartësit e përgjegjësive zyrtare.
“Në çdo rrethanë, ajo kërkon përkushtim të vazhdueshëm nga të gjithë mekanizmat dhe bartësit e përgjegjësive zyrtare, që në ushtrimin e mandatit të tyre të qëndrojnë me integritet, të sillen me maturi dhe të tregojnë besnikëri ndaj kushtetutshmërisë”, është shprehur ai.
Kurti ka theksuar gjithashtu rëndësinë e institucioneve të sistemit në interpretimin e normës kushtetuese dhe në ruajtjen e ekuilibrave të pushteteve, duke e lidhur këtë drejtpërdrejt me besimin e qytetarëve.
Në fund, ai ka riafirmuar angazhimin për përgjegjësi të lartë shtetërore dhe qytetare, duke e cilësuar këtë si garanci për paqe, drejtësi dhe siguri, si dhe për të ardhmen evropiane të Kosovës.
