Trajneri i Llapit, Tahir Batatina, ka vlerësuar lart profilin e futbollistit Arbnor Aliu, duke e konsideruar si një opsion të vlefshëm për Kombëtaren e Kosovës në prag të ndeshjeve të muajit qershor.
Përmes një postimi në Facebook, Batatina ka theksuar se Aliu është një lojtar me fleksibilitet të madh në fushë, i aftë të luajë si mesfushor defensiv, por edhe si qendërmbrojtës – një cilësi që, sipas tij, i ka munguar shpesh Kosovës në aspektin e balancimit defensiv.
“Arbnor Aliu është profil shumë interesant pikërisht për momentin që i duhet Kosovës. Një futbollist që mund të mbulojë më shumë se një rol në mbrojtje është shumë i vlefshëm për ekipin”, ka thënë Batatina.
Ai ka shtuar se në ndeshjet e qershorit, Kosova zakonisht përballet me sfida të qarta, si stabiliteti në mesfushë, mbulimi i kundërsulmeve dhe mungesa e alternativave në stol.
Sipas Batatinës, përfshirja e Aliut do t’i sillte Kombëtares më shumë siguri para mbrojtjes, mundësi për ndryshime taktike gjatë lojës – përfshirë kalimin në skema me tre mbrojtës – si dhe energji dhe disiplinë në organizimin defensiv.
Propozimi i trajnerit të Llapit vjen në një moment kur priten vendime të rëndësishme për përbërjen e Kombëtares së Kosovës, në prag të sfidave të ardhshme ndërkombëtare.
