Federata Ndërkombëtare e Futbollit (FIFA), e ka rikthyer vëmendjen tek Kosova për rritjen e saj të jashtëzakonshme në ranglistën botërore. FIFA publikoi të mërkurën renditjen e re të kombëtareve pas ndeshjeve të “play-off”-it për Kupën e Botës 2026, teksa të premten ka ndarë një postim në rrjetet sociale me fotografi të futbollistëve të Kombëtares së Kosovës, duke vlerësuar progresin e ekipit.
Në titull, FIFA thekson: “Kosova vazhdon të ngjitet”, duke treguar se Kombëtarja e Kosovës ka regjistruar ngjitjen më të madhe në ranglistë deri më tani.
Në postimin e saj, FIFA ka publikuar katër fotografi që tregojnë rrugëtimin e Kosovës në ranglistë:
Fotografia e parë tregon Fisnik Asllanin dhe Dion Gallapenin, simbol të rritjes së ekipit. Në fotografinë e dytë shfaqet Florent Muslija, ndërsa FIFA kujton se Kosova ishte e 190-ta në korrik të vitit 2016 dhe që nga ajo kohë trajektorja e ekipit ka qenë në rritje të vazhdueshme.
Fotografia e tretë paraqet Kreshnik Hajrizin, duke ilustruar rekordin e ri të arritur nga Kosova, e cila tani zë pozitën e 78-të në ranglistën botërore të FIFA-s, pozita më e lartë e arritur deri tani.
Në fotografinë e fundit shihen futbollistët e Kosovës me dorën mbi zemër gjatë intonimit të himnit shtetëror. FIFA vlerëson performancën e Kombëtares së Kosovës në kualifikimet për Kupën e Botës, duke nënvizuar se pozita e lartë në renditje u arrit pas një fushate impresive, ku Kosova përfundoi e dyta në grupin e vet dhe arriti ta mposhtë Sllovakinë në gjysmëfinale të “play-off”-it evropian, përpara se të ndalej nga Turqia në finale.
Ky postim i FIFA-s është një njohje e merituar e punës së vazhdueshme, përkushtimit dhe përfaqësimit të denjë që po ofron Kombëtarja e Kosovës në arenën ndërkombëtare dhe një promovim i mirë i vetë shtetit të Kosovës.
