Deputetja Jeta Statovci në një postim në profilin e saj në Facebook ka shkruar për zhvillime të rëndësishme që prekin drejtpërdrejt qytetarët e Podujevës dhe Mitrovicës, duke i cilësuar ato si hapa konkretë drejt përmirësimit të cilësisë së jetës dhe zhvillimit ekonomik.
Sipas saj, për Podujevën është miratuar një kredi prej 25 milionë euro për ndërtimin e impiantit të ujërave të zeza, e cila shoqërohet edhe me një grant prej 9 milionë euro. Kështu, vlera totale e këtij projekti arrin në 34 milionë euro.
Në të njëjtën kohë, është siguruar edhe një shumë shtesë prej 13 milionë euro për përmbylljen e projektit të rrugës Prishtinë–Mitrovicë, një segment kyç që pritet të lehtësojë qarkullimin dhe të forcojë lidhjen ekonomike mes rajoneve.
“Të gjitha këto janë ujë më i pastër, mjedis më i mbrojtur, qarkullim më i lehtë dhe më shumë mundësi për qytetarët”, ka theksuar deputetja Statovci.
Këto investime konsiderohen si ndër më të rëndësishmet infrastrukturore në këtë periudhë, duke ndikuar drejtpërdrejt në përmirësimin e kushteve jetësore dhe zhvillimin e qëndrueshëm në këto dy komuna.
