Shtetet australiane Victoria dhe Tasmania kanë njoftuar se do të ofrojnë transport publik falas si përgjigje ndaj rritjes së çmimeve të karburantit të shkaktuara nga përshkallëzimi i konfliktit në Lindjen e Mesme, transmeton Anadolu.
Sipas transmetuesit lokal SBS News, kryeministrja e shtetit Victoria, Jacinta Allan, tha se qeveria e saj do t’i bëjë falas të gjitha shërbimet e transportit publik për një muaj duke filluar nga e marta. Ajo theksoi se masa do ta bëjë më të përballueshme për qytetarët zgjedhjen e transportit publik në kushtet e rritjes së çmimeve të karburantit.
Banorët e shtetit Tasmania do të përfitojnë nga një periudhë edhe më e gjatë transporti falas, me udhëtime pa pagesë në autobusë dhe tragete deri më 30 qershor.
Megjithatë, qeveritë e dy shteteve australiane nuk kanë sinjalizuar se këto masa do të bëhen të përhershme.
Ndërkohë, New South Wales, Australia Perëndimore, Queensland dhe Australia Jugore kanë përjashtuar ndjekjen e këtij shembulli, duke theksuar se po fokusohen në forma të tjera lehtësimi për kostot e jetesës.
Sipas Institutit Australian të Naftës (AIP), çmimet e karburanteve në Australi kanë shënuar një rritje rekord prej 27 për qind që nga fillimi i konfliktit në Lindjen e Mesme.
Në një zhvillim të lidhur, kryeministri australian, Anthony Albanese, dje njoftoi se qeveria e tij do të mbështesë financiarisht blerjen e produkteve thelbësore të prekura nga konflikti në Lindjen e Mesme përmes masave të reja për sigurinë e karburantit.
Albanese do të takohet me drejtuesit e shteteve dhe territoreve për të diskutuar masa të tjera për të parandaluar mungesat e karburantit të hënën.
Përshkallëzimi rajonal ka vazhduar që nga 28 shkurti, kur Izraeli dhe SHBA-ja nisën një ofensivë ndaj Iranit, duke vrarë më shumë se 1.340 persona deri më tani, përfshirë liderin suprem të atëhershëm, Ali Khamenei.
Irani është kundërpërgjigjur me sulme me dronë dhe raketa ndaj Izraelit, Jordanisë, Irakut dhe vendeve të Gjirit që strehojnë asete ushtarake amerikane, duke shkaktuar viktima dhe dëme në infrastrukturë, si dhe duke trazuar tregjet globale dhe aviacionin.
