Sulmuesi i Kosovës, Vedat Muriqi, ka dhënë një deklaratë emocionale para finales ndaj Turqisë, sfidë që vendos për një vend në Kupën e Botës 2026.
Në një intervistë për HT Spor, ai e cilësoi kualifikimin e mundshëm si një moment historik për vendin, duke e krahasuar me shpalljen e pavarësisë, transmeton KosovaNews.
“Nëse marrim pjesë në Kupën e Botës, për qytetarët tanë kjo do të jetë si një pavarësi e dytë. Të gjithë janë shumë të emocionuar dhe shpresëplotë”, u shpreh Muriqi.
Sulmuesi dardan la të kuptohet edhe për një vendim të madh në karrierën e tij me Kombëtaren.
“Në prill bëhem 32 vjeç. Nëse e arrijmë këtë ëndërr dhe shkojmë sa më larg në Botëror, mendoj se do të jetë koha t’i them lamtumirë Kombëtares. Ky është kulmi për një futbollist dhe pas kësaj, rruga duhet t’u lihet të rinjve.”
Muriqi foli edhe për lidhjen e tij të veçantë me Turqinë, ku ka kaluar një pjesë të rëndësishme të karrierës.
“Unë u bëra Vedat në Turqi. Gjatë tetë viteve atje, klubet më formuan si lojtar. E flas turqishten si gjuhë amtare dhe respekti im për atë vend është i madh. Jemi rivalë vetëm për 90 apo 120 minuta.”
Sa i përket ndeshjes, ai pranoi se Turqia konsiderohet favorite në letër, por theksoi se Kosova do të mbështetet te avantazhi i fushës dhe forca e grupit.
“Turqia ka shumë cilësi, por ne kemi avantazhin që luajmë në shtëpi. E kemi treguar edhe ndaj Sllovakisë se nuk dorëzohemi kurrë. Jemi një ekip që lufton për çdo top.”
Në fund, Muriqi premtoi se Kosova do të japë maksimumin në një nga ndeshjet më të rëndësishme në historinë e saj.
“Do të japim gjithçka në fushë për ta realizuar këtë ëndërr.”
