Rrugët e Bratislavës janë pushtuar nga tifozët nga Kosova të mërkurën në mbrëmje, shkruajnë sot mediat sllovake.
Siç raporton Sport24.sk, kosovarët mbërritën në Sllovaki një ditë para ndeshjes eliminatore për kualifikimin në Kupën e Botës dhe menjëherë lanë gjurmë të mbërritjes së tyre.
Media shkruan se tifozët e Kosovës janë ndër më të apasionuarit në Evropë dhe kjo u ndje vërtet në kryeqytetin sllovak.
“Dardanët përmbytën fjalë për fjalë rrugët dhe lokalet në kryeqytetin e Sllovakisë, ku kënduan, brohoritën dhe e përjetuan plotësisht festivalin e futbollit. Brohoritjet e tyre me zë të lartë u përhapën në të gjithë qendrën e Bratislavës”, shkruan Sport24.sk.
Këngë tradicionale si “Mora fjalë” dhe “Xhamadani vija-vija” u luajtën në kafenetë dhe restorantet e Bratislavës gjatë gjithë mbrëmjes, dhe atmosfera ishte vërtet e veçantë, shkruan mediumi.
Sipas vlerësimeve, një numër i madh tifozësh mysafirë kanë mbërritur në Bratisllavë.
Biletat e rezervuara për sektorin e tifozëve dardanë u shitën të gjitha. Kosova ka 1,000 bileta në dispozicion në sektorin mysafirë dhe 300 të tjera në kategorinë e parë.
Megjithatë, flitet se shumë më tepër kosovarë do të jenë prezent në stadium të enjten në mbrëmje. Është raportuar se kosovarët mund të zënë deri në 50% të kapacitetit total prej 22,500 vendesh.
Megjithatë, Federata Sllovake e Futbollit (SFZ) i ka mohuar këto raportime në deklaratën e saj zyrtare. Ajo ka pranuar se ka verifikuar qindra emra me mbiemra ballkanikë të regjistruar në sektorët vendas, por thekson se këta mund të jenë njerëz me pasaporta nga vendet e BE-së, përfshirë Sllovakinë.
Në hyrje të stadiumit, do të bëhet një kontroll i plotë i dokumenteve dhe krahasimi i tyre me emrin në biletë, sipas Federatës sllovake. Nëse përcaktohet se ata kanë pasaporta të Kosovës që nuk paraqesin rrezik, organizatorët do t’u ofrojnë atyre një transferim në një sektor të rezervuar për mysafirë për arsye sigurie.
