Sytë e Brukselit vijojnë të mbeten vigjilentë ndaj reformave në Shqipëri, sidomos ndaj reformës në drejtësi, e cila mbetet një nga proceset më të rëndësishme dhe më të monitoruara me përkushtim nga Bashkimi Evropian.
Kështu deklaroi Komisionere për Zgjerimin e Bashkimi Evropian, Marta Kos në forumin e Politico, duke theksuar se progresi i Shqipërisë në këtë drejtim është i dukshëm, por kërkon vazhdimësi dhe seriozitet.
”Siç e dini SPAK po bën një punë të shkëlqyer në Shqipëri dhe në fakt është normale që ata të hetojnë apo të gjejnë shkelje”.
Në fjalën e saj, Marta Kos u shpreh se reforma në drejtësi nuk lidhet vetëm me ndërtimin e një kuadri të fortë ligjor, por edhe me zbatimin e tij në praktikë dhe me besimin që qytetarët duhet të kenë tek institucionet.
“Një tjetër element në luftën kundër korrupsionit, sidomos për vendet kandidate është se ti mund të kesh legjislacionin më të mirë por nëse korrupsioni është i pranuar në ato vende, atëherë të shfaqet një problem tjetër. Pra të gjithë ato vende, po shkojnë drejt një procesi të ndryshimit të mendësisë së konceptit të korrupsionit dhe për këtë do të duhet kohë”.
Sa i përket çështjes që lidhet me Belinda Balluku, komisionerja theksoi se është normale që në këtë fazë të reformës të ketë hetime ndaj zyrtarëve të lartë.
“Ju përmendët rastin e çështjes Balluku, të cilat ne po i monitorojmë me vëmendje. Por përpos çështjeve nën hetim, të rëndësishme janë dhe reagimet”.
Sipas Kos, më e rëndësishme sesa vetë hetimi është mënyra se si institucionet dhe shoqëria reagojnë ndaj këtyre rasteve, duke treguar pjekuri demokratike dhe respekt për shtetin e së drejtës.
