Ministrja e Ekonomisë, Artane Rizvanolli, ka pritur një delegacion të Bankës Botërore, të udhëhequr nga Xiaoqing Yu, me të cilin u diskutua për thellimin e bashkëpunimit në fusha prioritare.
Në takim u vlerësua bashkëpunimi i deritanishëm dhe mbështetja e vazhdueshme që ky institucion ka dhënë për Kosovën, veçanërisht në sektorin e energjisë dhe minierave. Palët u pajtuan për vazhdimin e partneritetit në projekte konkrete, përfshirë energjinë e ripërtëritshme, efiçiencën e energjisë dhe zhvillimin e kornizës rregullative, njofton zyra për informim e kësaj ministrie.
Ministrja Rizvanolli theksoi se Grupi i Bankës Botërore mbetet një partner strategjik për reformat dhe zhvillimin ekonomik të vendit, duke kontribuar në rritjen e sigurisë energjetike dhe modernizimin e sektorit.
Nga ana tjetër, përfaqësuesit e Bankës Botërore rikonfirmuan gatishmërinë për të mbështetur Kosovën edhe në të ardhmen, në përputhje me prioritetet qeveritare dhe objektivat për zhvillim të qëndrueshëm.
