Mbretëria e Bashkuar po “shqyrton intensivisht” se çfarë mund të bëjë për të ndihmuar në rihapjen e Ngushticës së Hormuzit, e cila është bllokuar nga Irani, duke çuar në rritje të çmimeve të energjisë. Kjo është bërë e ditur nga Sekretari Britanik i Energjisë, Ed Miliband, sipas të cilit ka disa mënyra për të mundëusar transportin detar.
“Po flasim me aleatët tanë. Ka mënyra të ndryshme se si mund ta bëjmë të mundur transportin detar. Po shqyrtojmë intensivisht me aleatët tanë se çfarë mund të bëhet, sepse është shumë e rëndësishme që të rihapet ngushtica”, tha Miliband në një intervistë me transmetuesin Sky News, kur u pyet nëse Britania po shqyrtonte mundësinë e dërgimit të pastruesve të minave ose dronëve për gjurmimin e minave në ngushticë.
Miliband kishte thënë më parë se ka një sërë gjërash që Mbretëria e Bashkuar mund të bëjë, duke përfshirë përdorimin e pajisjeve autonome për gjueti minash, por refuzoi të spekulonte se sa larg ishin këto propozime.
Ai gjithashtu mohoi sugjerimet se Britania nuk kishte një ushtri mjaftueshëm të madhe për të përmbushur të gjitha angazhimet e saj dhe në të njëjtën kohë për t’iu përgjigjur krizës. (A2 Televizion)
