Partia Partia GUXO ka reaguar ndaj raportimeve për gjoja dorëheqje në masë nga strukturat e saj në Pejë dhe Deçan, duke i cilësuar këto pretendime si të pavërteta dhe tendencioze.
Në një komunikatë për publikun, GUXO thekson se spekulimet e publikuara në disa media nuk reflektojnë realitetin dhe synojnë të krijojnë një perceptim të rremë në opinionin publik.
Sipas partisë, tre individët nga Peja që po përmenden në këto pretendime kanë paraqitur dorëheqje plot shtatë herë deri më tani dhe tashmë ka më shumë se një vit e gjysmë që nuk janë pjesë aktive e aktiviteteve të partisë.
“Tre individët nga Peja, të cilët po përmenden në këto pretendime, kanë paraqitur dorëheqje plot shtatë herë deri më tani dhe ka më shumë se një vjet e gjysmë që janë larguar nga çdo aktivitet i Partisë Guxo. Ky fakt flet më shumë për seriozitetin e tyre sesa për gjendjen reale në strukturat tona”, thuhet në reagim.
Sa i përket raportimeve për Deçanin, nga partia bëjnë të ditur se nuk bëhet fjalë për dorëheqje të kryesisë së degës, por vetëm për tërheqjen e dy anëtarëve.
“Ekziston vetëm një e vërtetë: dy anëtarë të kësaj dege janë tërhequr nga Guxo. Kjo është e gjitha dhe faktet jo vetëm se janë kokëforta, por ato mund të vërtetohen lehtë”, thuhet më tej në komunikatë.
Partia GUXO ka bërë të ditur se gjatë ditëve në vijim do të dalë me njoftime më të hollësishme lidhur me këto zhvillime, duke paralajmëruar se do të demantojë çdo dezinformatë që po qarkullon në opinion.
Po ashtu, bëhet e ditur se të hënën, më 16 mars, kryetarja e partisë do të shpalosë para opinionit publik qëndrimet e plota të Partia GUXO lidhur me këto zhvillime dhe, sipas tyre, përpjekjet për të deformuar realitetin politik.
