Në Gjykatën Themelore vazhdon edhe sot seanca gjyqësore lidhur me dyshimet për keqpërdorime në Korporatën Energjetike të Kosovës (KEK).
Në seancën e djeshme dëshmoi Emin Tmava, menaxher në Departamentin e Furnizimit në Zyrën e Prokurimit të KEK-ut, i cili foli për procedurat e prokurimit dhe riparimin e kaldajës së bllokut A5. Ai theksoi se kriteret për këtë procedurë kanë ekzistuar dhe se dëmi financiar i përmendur në aktakuzë, sipas tij, nuk lidhet me procesin e prokurimit.
Dëshmitar ishte edhe zyrtari i lartë i prokurimit në KEK, Mustafë Kavaja. Ai deklaroi se angazhimi i një eksperti është bërë përmes procedurës së negociuar pa publikim dhe se procedura është zhvilluar në përputhje me ligjin, duke përfunduar me nënshkrimin e kontratës nga të dyja palët.
Sipas tij, drejtori i Zyrës së Prokurimit, Ymer Dragusha, e kishte ngarkuar me dokumentacionin e kësaj procedure.
Sipas aktakuzës, ish-kryeshefi i KEK-ut, Nagip Krasniqi, së bashku me Ymer Dragushën dhe Isuf Zejnën, akuzohen se i kanë shkaktuar buxhetit të shtetit dëm rreth 37 milionë euro. Në seancat e ardhshme pritet të dëgjohen edhe dëshmitarë të tjerë.
