Ministria e Punëve të Jashtme dhe Diasporës ka njoftuar se në ambientet e jashtme të Ambasadës së Kosovës në Berlin, përkatësisht mbi pllakatin identifikues të objektit, janë vendosur etiketa fyese me përmbajtje shoviniste në gjuhën serbe.
Përmes një reagimi publik, MPJD shpjegon se mbishkrimet përmbajnë slogane nacionaliste dhe nxitëse, përfshirë mesazhet si: “Nuk ka dorëzim”, “Kosova është Serbi”, si dhe thirrje të tjera me konotacion propagandistik dhe përçarës.
Menjëherë pas identifikimit të rastit, Ambasada ka njoftuar autoritetet kompetente në Gjermani. Policia gjermane është informuar dhe pritet të ndërmarrë veprimet përkatëse në vendngjarje, përfshirë hetimin e plotë të rrethanave dhe identifikimin e personave përgjegjës.
“Ministria e Punëve të Jashtme dhe Diasporës dënon fuqishëm çdo akt vandalizmi, gjuhë urrejtjeje dhe çdo përpjekje për të cenuar përfaqësitë diplomatike të Republikës së Kosovës”- thuhet në reagimin e lëshaur, më 03.03.2026.
Në reagim theksohet se veprime të tilla janë të papranueshme dhe bien ndesh me normat dhe konventat ndërkombëtare që garantojnë paprekshmërinë e misioneve diplomatike.
