Kryeministri i Kosovës, Albin Kurti, ka deklaruar se aktualisht nuk ka marrëveshje politike për zgjedhjen e presidentit të ri, duke theksuar se situata mbetet e hapur dhe se do të vazhdojnë përpjekjet për arritjen e një zgjidhjeje.
Komentet ai i bëri pas takimit me kryetarin e Lidhja Demokratike e Kosovës, Lumir Abdixhiku, ku çështja e presidentit ishte temë kryesore e diskutimit.
Kurti tha se mazhoranca aktualisht ka 66 deputetë, por i duhen edhe 14 vota për të siguruar zgjedhjen e presidentit.
“Me 66 deputetë përbëjmë mazhorancën, por nuk i kemi edhe 14 të tjerë që të sigurohemi se gjithçka do të shkojë mbarë në ditën kur duhet ta zgjedhim presidentin”, u shpreh ai.
Sipas tij, aktualisht nuk ka figurë konsensuale dhe as marrëveshje politike, duke e cilësuar situatën më të ndërlikuar pas qëndrimit të Partia Demokratike e Kosovës që kandidati për president të jetë partiak.
“Nuk kemi figurë konsensuale, ndërkaq nuk kemi as marrëveshje politike. Do të vazhdoj të komunikoj që të arrijmë te rezultati dhe suksesi i zgjedhjes së presidentit”, tha Kurti.
Kryeministri Kurti tha se po vathojnë me përpjekjet për zgjedhjen e presidentit, për të cilin kërkohen 80 vota.
“Po i vazhdojmë përpjekjet për të përmbyllur me sukses edhe sfidën e zgjedhjes së presidentit. Na duhet kandidati apo kandidatja që siguron 80 vota në sallë. Pas takimit me kryetarin e PDK-së Bedri Hamzën, po takohemi edhe me kryetarin e LDK-së, gjithçka brenda fare pak ditësh do të merret vesh”, tha Kurti.
