Kryeministri i Kosovës, Albin Kurti, së bashku me kryetaren e Kuvendit, Albulena Haxhiu, nënkryetarin Ardian Gola dhe përfaqësues të tjerë institucionalë, kanë bërë homazhe në Qirez dhe Likoshan, me rastin e 28-vjetorit të masakrës, për të nderuar martirët dhe dëshmorët e rënë.
Me këtë rast, kryeministri Kurti ka theksuar se masakra e kryer në Qirez dhe Likoshan shënoi një moment të rëndësishëm të ndërgjegjësimit kombëtar.
“Në mesin e tyre ishte edhe gruaja shtatzënë në muajin e shtatë, Rukije Nebihu, 27-vjeçare, e cila në prehër e kishte vajzën trevjeçare që e takuam sot këtu. Por u vranë shumë të familjes Ahmeti, Sejdiu, pastaj Behrami, Fazliu, Rama, dhe katër dëshmorë të Ushtrisë Çlirimtare të Kosovës, të familjeve Rexhepi dhe Gjeli, në një përballje të pabarabartë me forcat e Serbisë”, ka deklaruar Kurti.
Ai ka shtuar se forcat serbe për 28 orë rresht kanë ushtruar dhunë të pandërprerë ndaj popullatës civile.
“Të cilët për 28 orë kanë goditur, kanë shtënë me artileri të rëndë, kanë pasur autoblinda dhe helikopter. Por pikërisht në kohën e kësaj masakre, me 28 shkurt të vitit 1998, kur për 28 orë rresht, artileria dhe forcat armike të Serbisë sulmuan popullsinë këtu, u bë një ndërgjegjësim i madh i popullit jo vetëm në Kosovë, por anë e mbanë trojeve që shqiptarët i popullojnë në Ballkan, edhe të mërgatës sonë”, ka theksuar ai.
Sipas Kurtit, kjo masakër ndikoi edhe në rritjen e vëmendjes ndërkombëtare ndaj krimeve të kryera në Kosovë.
“Filloi edhe një vetëdijësim gjithnjë më i madh edhe i këtyre kancelarive diplomatike botërore, po njëkohësisht edhe i opinionit publik ndërkombëtar”, ka thënë Kurti.
Kryeministri ka nënvizuar se sakrifica e të rënëve obligon institucionet e Kosovës që të forcojnë kapacitetet mbrojtëse të vendit.
“Çmimi i lartë i lirisë na obligon ta forcojmë Forcën e Sigurisë së Kosovës, në mënyrë që askush asnjëherë të mos guxojë më të na mësyjë e të na vrasë sikurse në të kaluarën”, ka deklaruar ai.
Në fund, Kurti ka theksuar rëndësinë historike të gjakut të derdhur për liri.
“Gjaku i tyre është tek rrënjët e lirisë, tek themelet e shtetit, dhe natyrisht është kujtesë e përjetshme historike se si duhet ta mbrojmë dhe ta duam Republikën tonë dhe popullin tonë”, ka përfunduar ai.
Masakra e Likoshanit dhe Qirezit, në të cilën u vranë 24 persona, konsiderohet si e para nga masakrat e kryera nga shteti serb në Kosovë gjatë luftës së viteve 1998–1999.
