Derisa edhe pak ditë kanë mbetur deri në përmbylljen e afatit kushtetues për zgjedhjen e kreut të shtetit, Partia Demokratike e Kosovës thotë se në pozitën më të lartë shtetërore nuk duhet të jetë një emër i njëanshëm.
“Dikush që ka reputacion e integritet vendor dhe ndërkombëtar dhe dikush që ka kontribute e është intelektual, që i bën nder edhe shtetit të Kosovës dhe qytetarëve. Vazhdojmë të mbesim brenda këtyre qëndrimeve, në kuptim të asaj që të diskutohet në parim dhe standard se kush do të duhej t’i plotësonte këto atribute për të qenë president i vendit”, tha shefi i Grupit Parlamentar të PDK-së, Arian Tahiri.
Por, sipas tij, nëse forca më e madhe politike, nuk e bën këtë, ata janë të gatshëm edhe të japin emra që do të përmbushnin këtë kriter për të qenë president apo presidente e vendit, por edhe të shkojnë në zgjedhje.
“Ende nuk është faza që kanë folur për emra të përveçëm, nuk kemi folur as dje, s’po flasim as sot, por vullneti i PDK-së është të kontribuoj në interes të institucioneve të vendit dhe shoqërisë, por nëse nuk do të mund të gjendet dikush apo nëse nuk do të ketë disponim prej forcës kryesore politike, PDK është e gatshme gjithashtu të shkojë në zgjedhje”, deklaroi Tahiri.
Ai është pyetur nëse PDK do t’i jepte mbështetje, Vjosa Osmanit edhe për një tjetër mandat, ai tha se vendit nuk i bën nder një emër që ka pasur qasje të njëanshme.
“Nuk është dua të lëshohem në emra të përveçëm, por mendoj që vendit nuk i bën nder një emër që ka pasur qasje të njëanshme dje, dikush që përfaqëson veç një grup apo subjekt, por po flasim për dikë që është mbi partitë politike. Në këtë nivel jemi duke folur në parime dhe standarde, por nëse është e nevojshme dhe e arsyeshme dhe kërkohet, padyshim që PDK do të nxjerrë edhe emra”, tha ai.
Tahiri tha se çështja e marrëveshjes politike ka përfunduar. “Marrëveshje politike i kish ra kur është formuar Qeveria. PDK nuk është e interesuar për marrëveshje politike, por për të pasur qasje proaktive, pozitive, mbështetëse për institucionet dhe mbështetë një kandidat që plotëson këto standarde”, deklaroi shefi i deputetëve të PDK-së.
