Pas një periudhe të gjatë në arrati, është dorëzuar sot ish-zëvendëskryeministri i parë i Maqedonia e Veriut, Artan Grubi. Ai është vetëdorëzuar pranë autoriteteve policore në vendkalimin kufitar Bllacë.
Sipas njoftimit zyrtar të Ministrisë së Punëve të Brendshme, Grubi është privuar nga liria në orën 06:10 dhe është dërguar në mbajtje për procedura të mëtejshme. Ai po përballet me akuza që lidhen me rastin e Lotarisë Shtetërore, ndërsa ndaj tij kishte qenë aktive masa “Arresto”.
Autoritetet pritet të japin detaje shtesë gjatë ditës lidhur me hapat e mëtejshëm proceduralë, njoftojnë mediet në RMV.
Kujtojmë se në dhjetor të vitit 2024, Departamenti Amerikan i Shtetit (DASH) e kishte futur Artan Grubin në listën e zezë të Shteteve të Bashkuara, së bashku me gjykatësin e Gjykatës së Apelit, Enver Behxheti, për përfshirje në atë që u cilësua si “korrupsion i madh”.
Sipas DASH-it, Grubi dhe Behxheti dyshohet se kanë pranuar ryshfet për të ndikuar dhe minuar proceset gjyqësore që lidhnin me dënimin penal të Sasho Mijalkovit, ish-drejtor i shërbimit sekret. Në listën e zezë u përfshinë gjithashtu edhe anëtarë të familjes së ngushtë të Grubit.
Artan Grubi ka ushtruar funksionin e zëvendëskryeministrit të Maqedonisë së Veriut gjatë mandatit 2020–2024, si përfaqësues i Bashkimit Demokratik për Integrim (BDI).
Pas vendimit të DASH-it, Grubi reagoi përmes një postimi në Facebook, duke deklaruar se ishte informuar për vendimin përmes mediave dhe duke mohuar çdo përfshirje në korrupsion.
“Si një person që jetën time publike ia kam kushtuar mbrojtjes së vlerave demokratike perëndimore dhe që kam punuar vazhdimisht për anëtarësimin e vendit në NATO dhe Bashkimin Evropian, ky vendim më prek drejtpërdrejt dhe personalisht”, kishte shkruar ai.
Pas shpalljes së urdhrit për arrestim nga autoritetet e Maqedonisë së Veriut, Grubi ishte larguar nga vendi, deri në dorëzimin e tij sot.
