Deputeti i Lëvizjes Vetëvendosje, Mytaher Haskuka reaguar ashpër ndaj kërkesës së prokurorisë për dënime maksimale ndaj ish-krerëve të UÇK-së duke e cilësuar atë si një akt politik dhe jo si përpjekje për vendosjen e drejtësisë.
Në një reagim publik, Haskuka thekson se kjo qasje synon “ta përmbysë rendin e së vërtetës”, duke rikujtuar se shteti i Serbisë nën regjimin Milloshoviçit, ka kryer gjenocid në Kosovë, ndërsa UÇK-ja ka luftuar për të mbrojtur popullin nga planet dhe veprimet gjenocidale.
Sipas tij, gjykata që po trajton këto raste nuk ka ardhur si rezultat i një nevoje të brendshme për drejtësi, por si produkt i një projekti ndërkombëtar të ndërtuar mbi raporte politike, presione diplomatike dhe interesa gjeopolitike.
Ai thekson se në këtë proces kanë pasur rol aktiv Rusia, Serbia dhe aleatët e tyre.
Haskuka rikujton se e ka kundërshtuar këtë proces që nga fillimi, duke vlerësuar se drejtësia nuk mund të jetë selektive, njëetnike dhe e ndërtuar mbi shtrembërimin e historisë. “Një drejtësi e tillë nuk i shëron plagët, por i thellon ato”, thekson ai.
Në fund të reagimit, Haskuka nënvizon qëndrimin e qartë të Lëvizjes Vetëvendosje se çlirimi nuk është krim dhe rezistenca nuk është ndërmarrje kriminale.
Ai thekson se historia e Kosovës nuk mund të rishkruhet nga aktakuza që, siç shprehet ai, i shërbejnë narrativës së agresorit, duke theksuar se drejtësia e vërtetë fillon vetëm atëherë kur emërtohet saktë pushteti i dhunës gjenocidale dhe njihet legjitimiteti i luftës për liri.
Reagimi i plotë:
Kërkesa e prokurorisë për dënime maksimale ndaj ish-krerëve të UÇK-së nuk është një akt për kërkim drejtësie por një politikë që synon ta përmbysë rendin e së vërtetës.
Jugosllavia e Serbisë së Millosheviqit ka kryer gjenocid në Kosovë. Kjo është e vërteta. UÇK ka luftuar kundër planeve dhe veprimeve gjenocidale duke mbrojtur popullin me gjithë forcën në dispozicion.
…
…
Kjo gjykatë nuk erdhi nga një nevojë e brendshme për drejtësi, por nga një projekt ndërkombëtar i ndërtuar mbi raporte politike, presione diplomatike dhe interesa gjeopolitike, ku Rusia, Serbia dhe aleatët e saj kanë pasur rol aktiv. Lëvizja VETËVENDOSJE! e ka kundërshtuar këtë proces që nga fillimi e madje edhe para fillimit, sepse drejtësia nuk mund të jetë selektive, njëetnike dhe e ndërtuar mbi shtrembërimin e historisë. Një drejtësi e tillë nuk shëron plagë, por i thellon ato.
Lëvizja VETËVENDOSJE! qëndron e qartë dhe pa ekuivoke: çlirimi nuk është krim, rezistenca nuk është ndërmarrje kriminale dhe historia e Kosovës nuk mund të rishkruhet nga aktakuza që i shërbejnë narrativës së agresorit. Drejtësia e vërtetë fillon aty ku emërtohet saktë pushteti i dhunës gjenocidale dhe njihet legjitimiteti i luftës për liri. Pa këtë, çdo vendim është vetëm një formë tjetër e padrejtësisë.
Lëvizja VETËVENDOSJE!
