Kuvendi i Kosovës ka konstituar legjislaturën e re, ndërsa Albulena Haxhiu është zgjedhur kryetare e Kuvendit të Kosovës.
Në seancën konstituive, e cila u udhëhoq nga deputeti më i vjetër Avni Dehari nga Lëvizja Vetëvendosje, me asistimin e deputetes më të re Fatma Taçi nga KDTP, fillimisht u formua Komisioni i Përkohshëm për verifikimin e kuorumit dhe mandateve të deputetëve, pasuar nga betimi i tyre.
Pas përmbylljes së këtyre procedurave, Kuvendi votoi për zgjedhjen e kryetares. Albulena Haxhiu mori 66 vota për, 44 kundër dhe 8 abstenime, duke siguruar shumicën e nevojshme për të marrë drejtimin e institucionit ligjvënës.
Në vijim të seancës pritet të votohet edhe për nënkryetarët e Kuvendit, të cilët, sipas praktikës parlamentare, pritet të miratohen si një pako e vetme, me qëllim të përshpejtimit të konstituimit të plotë të Kuvendit dhe hapjes së rrugës për formimin e Qeverisë së re.
