Në zonën e Klosit po vazhdon operacioni i përbashkët i kërkim-shpëtimit për gjetjen e trupit të 30-vjeçarit të zhdukur, me pjesëmarrjen e forcave ushtarake të Republikës së Shqipërisë dhe të Kosovës.
Ministri i Mbrojtjes i Kosovës, Ejup Maqedonci, së bashku me homologun e tij shqiptar, Pirro Vengu, kanë vizituar sot njësitë ushtarake të angazhuara në terren, duke ndjekur nga afër ecurinë e kërkimeve.
Forca e Sigurisë së Kosovës është e angazhuar në këtë operacion që nga data 29 janar, me njësinë e specializuar të kërkim-shpëtimit. Në terren po përdoren kapacitete të avancuara, përfshirë personel të trajnuar për kërkime në ujëra, skanerë dhe dronë nënujorë, me qëllim lokalizimin sa më të shpejtë të trupit.
Autoritetet kanë bërë të ditur se kërkimet do të vazhdojnë pa ndërprerje, ndërsa personeli i angazhuar mbetet në krye të detyrës deri në përfundimin e operacionit.
