Njësiti i Trafikut të Kryeqytetit ka ndërmarrë masa ndëshkuese ndaj një vozitësi i cili është kapur duke bërë tejkalim të kolonës së automjeteve në mënyrë të kundërligjshme, duke shfrytëzuar trotuarin.
Sipas njoftimit të Policisë së Kosovës, vozitësi është identifikuar nga zyrtarët policorë dhe ndaj tij janë shqiptuar masa në përputhje me legjislacionin në fuqi. Konkretisht, atij i është shqiptuar gjobë në vlerë prej 200 euro, dy pikë negative në patentë-shofer dhe ndalesë e patentës për një periudhë prej tre muajsh.
Policia ka apeluar te të gjithë pjesëmarrësit në trafik që të respektojnë rregullat dhe shenjat e komunikacionit rrugor, duke theksuar se tejkalimet e tilla, sidomos përmes trotuarit, përbëjnë rrezik serioz për sigurinë e këmbësorëve dhe pjesëmarrësve të tjerë në trafik.
