Ish-Presidenti amerikan Bill Clinton dhe bashkëshortja e tij Hillary Clinton, ish-Sekretare e Shtetit, kanë rënë dakord të dëshmojnë në hetimin e Kongresit lidhur me abuzuesin seksual, Jeffrey Epstein. Vendimi merret disa ditë përpara një votimi të planifikuar në dhomën e përfaqësuesve për të mbajtur përgjegjës çiftin Clinton për shkak të refuzimit për t’u paraqitur para Komitetit të Mbikëqyrjes së Dhomës së Përfaqësuesve pas një përplasjeje që ka zgjatur disa muaj.
Bill Clinton kishte njohje me Epstein, i cili vdiq në burg në vitin 2019, por ka mohuar se kishte dijeni për krimet e tij seksuale dhe thotë se i ndërpreu kontaktet me të rreth dy dekada më parë.
Nuk është ende e qartë se kur do të zhvillohen dëshmitë, por kjo do të jetë hera e parë që një ish-president amerikan dëshmon para një paneli të Kongresit që nga viti 1983, kur e bëri këtë Gerald Ford. Të hënën në mbrëmje, zëvendësshefi i stafit të Bill Clinton, Angel Ureña, postoi në platformën X duke konfirmuar se çifti do të paraqitet para komitetit.
“Ata negociuan me mirëbesim,” shkroi Ureña në një postim drejtuar Komitetit të Mbikëqyrjes së Dhomës. “Ju jo. Ata ju thanë nën betim atë që dinë, por ju nuk ju intereson. Megjithatë, ish-Presidenti dhe ish-Sekretarja e Shtetit do të jenë aty. Ata presin me padurim të vendosin një precedent që vlen për të gjithë.”
Të dy Clintons thonë se më parë i kanë dhënë komitetit deklarata nën betim dhe se tashmë kanë ofruar “informacionin e kufizuar” që kishin mbi Epstein. Çifti i kishte hedhur poshtë thirrjet ligjore si “asgjë më shumë sesa një manovër për të turpëruar rivalët politikë, siç ka urdhëruar Presidenti Trump”.
Bill Clinton nuk është akuzuar kurrë për shkelje ngatë mbijetuarit e abuzimeve të Epstein dhe ka mohuar se kishte dijeni për krimet e tij seksuale. Regjistrat e avionit privat të Epstein tregojnë se Clinton kreu katër fluturime ndërkombëtare në vitet 2002 dhe 2003. Ish-presidenti shfaqet gjithashtu në pronën e financierit të ndjerë në disa fotografi, ndër të cilat një duke notuar në një pishinë, ndërsa një tjetër e tregon të shtrirë në shpinë me duart pas kokës, në atë që duket të jetë një vaskë me ujë të nxehtë. (A2 Televizion)
