Kryeministri i Kosovës, Albin Kurti, ka vlerësuar lart regjisorin dhe dramaturgun shqiptar Mario Banushi, i cili së fundmi u nderua me Luanin e Argjendtë në Bienalen e Teatrit të Venecias, duke u bërë laureati më i ri në historinë e këtij çmimi prestigjioz.
“Pasi triumfoi në disa nga skenat dhe teatrot më të njohura të botës dhe u shpall zbulimi i vitit në edicionin e fundit të Festivalit të Avinjonit, Mario Banushi u nderua me Luanin e Argjendtë në Bienalen e Teatrit të Venecias”, shkruan Kurti në një postim në Facebook, duke theksuar se Luani i Artë për karrierën iu nda regjisores italiane Emma Dante.
Kurti nënvizon se Banushi, vetëm 27 vjeç dhe pothuajse autodidakt, renditet tashmë përkrah emrave të mëdhenj të artit botëror që kanë marrë këtë çmim, si Fellini, Kurosawa, Liddell, Guadagnino e të tjerë.
Sipas tij, kritika ndërkombëtare e cilëson krijimtarinë e Banushit si thellësisht poetike, ku veprat skenike si “Goodbye, Lindita”, “Taverna Mirësia” dhe “Mami” shquhen për intensitet emocional, saktësi plastike të imazheve dhe një estetikë që ndërthur mitin, ëndrrën dhe kujtesën. “E quajnë një Tarkovski të teatrit bashkëkohor”, thekson Kurti.
Duke folur për prejardhjen e artistit, Kurti rikujton se Banushi ka lindur në Athinë dhe është rritur mes Shqipërisë dhe Greqisë, përvojë që, sipas tij, mishërohet fuqishëm në artin e tij dhe pasqyron realitetin e ndarjes, mërgimit dhe jetës diasporike të shumë shqiptarëve.
“Siç shprehej Hannah Arendt, refugjatët janë shpesh pararoja e popullit të tyre. Me artin e vet intim dhe universal, që ka rezonuar nga Brazili në Tajvan e nga Nju Jorku në Berlin, Mario Banushi është një nga dëshmitarët më autentikë të jetës shpirtërore të shqiptarëve të shekullit XXI”, shkruan Kurti.
Në fund, kryeministri shpreh keqardhjen që veprat e Banushit ende mungojnë në skenat shqiptare dhe uron që sa më shpejt të krijohen kushtet që publiku shqiptar t’i njohë nga afër.
