Presidenti rus, Vladimir Putin u ka thënë negociatorëve amerikanë se një “zgjidhje afatgjatë” për përfundimin e luftës së Moskës në Ukrainë nuk mund të arrihet pa u zgjidhur më parë çështjet territoriale, sipas një zyrtari të Kremlinit.
“Gjëja kryesore është se gjatë këtyre negociatave mes Presidentit tonë dhe amerikanëve, u theksua edhe një herë se pa zgjidhjen e çështjes territoriale sipas formulës së rënë dakord në Anchorage, nuk duhet pritur arritja e një zgjidhjeje afatgjatë”, u tha gazetarëve të premten ndihmësi i Kremlinit për politikën e jashtme, Yuri Ushakov.
Bisedimet e përfunduara së fundmi mes Putinit dhe të dërguarit special të Donald Trumpit, Steve Witkoff, si dhe Jared Kushnerit në Moskë, zgjatën rreth katër orë dhe u përshkruan nga Ushakov si “jashtëzakonisht thelbësore, konstruktive dhe, do të thosha, jashtëzakonisht të sinqerta dhe konfidenciale”.
Disa orë para se të fluturonte për në Moskë, Witkoff tha se negociatat për të arritur një marrëveshje paqeje ishin “reduktuar në një çështje të vetme”, shkruan cnn.
“Mendoj se kemi mbetur te një çështje e vetme dhe kemi diskutuar variante të ndryshme të asaj çështjeje, që do të thotë se ajo është e zgjidhshme”, tha ai, duke folur në një aktivitet në Davos.
Një zyrtar evropian më pas i konfirmoi CNN-it se çështja e mbetur, së cilës iu referua Witkoff, ishte territori.
Gjatë takimit në Moskë me Witkoff dhe Kushner, Putin theksoi se Rusia është “sinqerisht e interesuar për zgjidhjen e krizës ukrainase përmes mjeteve politike dhe diplomatike”, tha Ushakov.
Por derisa kjo të ndodhë, Rusia do të vazhdojë ta “ndjekë” pushtimin e saj “në fushëbetejë, ku Forcat e Armatosura Ruse kanë iniciativën strategjike”, shtoi Ushakov.
Presidenti amerikan, Donald Trump e kishte pritur Putinin vitin e kaluar në një samit shumë të reklamuar në Anchorage, Alaska, i cili përfundoi pa ndonjë përparim konkret dhe me pak detaje mbi atë që ishte diskutuar. /Telegrafi/
