Kryeministri i Kosovës, Albin Kurti, ka deklaruar se Republika e Kosovës mbështet operacionin e gjerë anti-narkotik të Shteteve të Bashkuara të Amerikës në Venezuelë, i udhëhequr nga presidenti amerikan Donald Trump.
Përmes një postimi, Kurti ka theksuar se mbajtja përgjegjës e aktorëve shtetërorë të përfshirë në trafikimin e drogave është thelbësore për suksesin e luftës globale kundër kësaj dukurie.
Sipas tij, Kosova, si aleate strategjike e SHBA-së dhe NATO-s, ofron mbështetje të plotë në luftën kundër trafikimit të narkotikëve, por edhe kundër cenimit të vlerave demokratike perëndimore nga aktorë përfaqësues të kundërshtarëve të këtyre vlerave.
“Kosova, si aleate strategjike e ShBA-së dhe NATO-s, ofron mbështetje të plotë në luftën kundër trafikimit të narkotikëve dhe kundër cenimit të vlerave demokratike perëndimore nga aktorë përfaqësues (proxy) të kundërshtarëve të këtyre vlerave, si në rajonin tonë ashtu edhe më gjerë”, ka shkruar Kurti.
Në këtë kontekst, kryeministri ka ritheksuar nevojën për rritjen e vëmendjes ndaj aktorëve të caktuar rajonalë, të cilët, sipas tij, në vazhdimësi synojnë destabilizimin e situatës së sigurisë përmes veprimeve hibride, kriminale, terroriste dhe ushtarake.
