Lidhja Demokratike e Kosovës ka reaguar pas ndarjes nga jeta të ish-kryetarit të Kuvendit, akademikut Nexhat Daci, duke e vlerësuar kontributin e tij si të pazëvendësueshëm në jetën institucionale, politike dhe akademike të vendit.
Kryetari i LDK-së, Lumir Abdixhiku, në një telegram ngushëllimi drejtuar familjes Daci, miqve dhe bashkëpunëtorëve, ka theksuar se Nexhat Daci ishte një personalitet me integritet të lartë, dije të thellë dhe përkushtim të rrallë ndaj shërbimit publik.
Sipas Abdixhikut, Daci la gjurmë të pashlyeshme në ndërtimin e institucioneve demokratike të Kosovës, duke kontribuar si Kryetar i Kuvendit, deputet, akademik dhe drejtues i institucioneve shkencore. Ai u vlerësua gjithashtu për rolin e tij në zhvillimin e mendimit shkencor dhe akademik në vend.
“Në kohët më të vështira për popullin e Kosovës, Nexhat Daci u rreshtua me vendosmëri në shërbim të kauzës për liri dhe pavarësi, si bashkëpunëtor i afërt i Presidentit historik Ibrahim Rugova”, thuhet në telegramin e Abdixhikut.
LDK ka shprehur ngushëllime të sinqerta, duke nënvizuar se trashëgimia politike dhe akademike e Nexhat Dacit do të mbetet pjesë e rëndësishme e historisë së Kosovës.
