Pjesëtarët e Operacioneve Speciale të Forcës së Sigurisë së Kosovës kanë përfunduar me sukses një trajnim intensiv në xhunglat tropikale të Belizes, në kuadër të përgatitjeve për operacione në mjedise të vështira dhe komplekse.
Lajmin e ka bërë të ditur ministri i Mbrojtjes, Ejup Maqedonci, duke theksuar se ky trajnim është realizuar në bashkëpunim me njësitë parashutiste të Ushtrisë së Mbretërisë së Bashkuar.
Sipas Maqedoncit, stërvitja kishte për qëllim zhvillimin e aftësive për mbijetesë, lëvizje taktike dhe operime efektive në kushte ekstreme. Gjatë trajnimit, pjesëtarët e Operacioneve Speciale u përballën me terren të dendur, klimë të ashpër dhe lodhje të vazhdueshme, duke testuar përgatitjen e tyre fizike dhe mendore.
Ai theksoi se aktiviteti ka përforcuar disiplinën, qëndrueshmërinë dhe bashkëpunimin mes pjesëtarëve, duke dëshmuar nivelin e lartë të profesionalizmit dhe aftësinë e tyre për të vepruar në çdo mjedis operacional.
“FSK, krenaria jonë!”, ka përfunduar Maqedonci.
