Bordi i Zyrës së Rregullatorit për Energji (ZRRE) ka mbajtur një takim koordinues me kompanitë e licencuara të sektorit energjetik, me qëllim vlerësimin e sigurisë së furnizimit me energji elektrike gjatë periudhës së fundvitit, e cila shënon rritje të ndjeshme të konsumit.
Në takim morën pjesë përfaqësues të Korporatës Energjetike të Kosovës (KEK), Operatorit të Sistemit të Transmisionit dhe Tregut (KOSTT), Operatorit të Sistemit të Shpërndarjes (KEDS) si dhe Furnizuesit me Shërbim Universal (KESCO).
“Gjatë diskutimeve u trajtuan sfidat kryesore që zakonisht shfaqen në periudhat festive, përfshirë ndikimin e kushteve dimërore në prodhim dhe transmetim të energjisë, kufizimet teknike të rrjetit, nevojën për balancim të vazhdueshëm mes prodhimit, importit dhe konsumit, si dhe përmbushjen e obligimeve ndërkombëtare në kuadër të funksionimit të sistemit rajonal të energjisë. Po ashtu, u diskutua organizimi institucional gjatë periudhës së pushimeve dhe zgjedhjeve qendrore.
Përfaqësuesit e ndërmarrjeve të licencuara prezantuan kapacitetet teknike dhe operative, si dhe masat parandaluese të ndërmarra për përballimin e ngarkesave të shtuara. ZRRE ka kërkuar nga operatorët përgjegjës që të hartojnë dhe përditësojnë planet e menaxhimit të gjendjes, përfshirë skenarë të mundshëm dhe masa të paraplanifikuara për situata të paparashikuara”, njofton kjo zyre.
Ndërkohë, ZRRE u ka bërë thirrje qytetarëve dhe bizneseve që të tregohen të kujdesshëm dhe racionalë në përdorimin e energjisë elektrike, veçanërisht gjatë orëve të pikut, duke theksuar se kursimi i energjisë kontribuon drejtpërdrejt në stabilitetin e sistemit dhe sigurimin e furnizimit të vazhdueshëm për të gjithë konsumatorët.
ZRRE ka bërë të ditur se do të vazhdojë monitorimin e afërt të situatës dhe bashkëpunimin e ngushtë me të gjithë operatorët e sektorit, me synim garantimin e një furnizimi të sigurt dhe të qëndrueshëm me energji elektrike gjatë periudhës së fundvitit.
