Ministri në detyrë i Financave, Hekuran Murati, ka reaguar ndaj një lajmi të publikuar nga portali “Veriu Info”, i cili pretendonte se Qeveria Kurti do të ekzekutonte pagën e 13-të për punonjësit e sektorit publik para zgjedhjeve. Ai e ka cilësuar këtë si lajme të rreme dhe ka theksuar se paga e 13-të nuk lidhet me asnjë vendim të ri të Qeverisë.
Murati ka sqaruar se paga e 13-të është paraparë në projektligjin e buxhetit për vitin 2026 – dokument të cilin, sipas tij, partitë opozitare e kanë bllokuar në Kuvend.
“Lajmet e rreme nuk kalojnë! Paga e 13-të është e paraparë në ligjin e buxhetit për vitin 2026. Por siç e dinë të gjithë, ligjin e buxhetit për vitin 2026 nuk e votuan PDK/LDK/AAK-Nisma.”
Ministri në detyrë ka shprehur keqardhje për, siç tha ai, strategjinë e opozitës për të shpërndarë dezinformata në mungesë të një programi të qartë. Ai akuzoi partitë opozitare dhe mediat pranë tyre se po përdorin “rrena të vazhdueshme” për të krijuar pakënaqësi ndaj qeverisë.
Thirrja për verifikim të informacionit
Murati u ka bërë thirrje qytetarëve të verifikojnë çdo njoftim që lidhet me Qeverinë dhe të mos bien pre e dezinformimeve.
“Nëse shihni çfarëdo njoftimi që ka të bëjë me Qeverinë, mos u besoni pa e verifikuar fillimisht nëse diçka e tillë është thënë nga kanalet zyrtare.”
Reagimi i tij vjen në kohën kur në skenën publike janë shtuar informacionet e pasakta mbi politikat financiare, në prag të zgjedhjeve të ardhshme.
