Komisioni Qendror i Zgjedhjeve mban sot, më 10 dhjetor 2025, mbledhjen e 95-të të rregullt në ora 16:00, në zyrat e institucionit. Mbledhja kryesohet nga kryetari, Kreshnik Radoniqi.
Gjatë takimit pritet të shqyrtohen dhe miratohën disa çështje të rëndësishme për organizimin e Zgjedhjeve të Parakohshme për Kuvendin e Republikës së Kosovës, që mbahen më 28 dhjetor 2025. Ndër vendimet kryesore janë:
Certifikimi i kandidatëve të subjekteve politike për zgjedhjet e 28 dhjetorit;
Miratimi i qendrave të votimit dhe vendvotimeve në përfaqësitë diplomatike;
Miratimi i specifikimeve për materialet e posaçme për votuesit e verbër;.
Caktimi i numrit maksimal të votuesve në vendvotimet e rregullta dhe vendvotimet me kusht;
Certifikimi i Listës së Votuesve për zgjedhjet parlamentare;
Miratimi i ekzemplarit të fletëvotimit dhe numrit të fletëvotimeve që do të shtypen;
Procedurat e pranim–dorëzimit të materialeve zgjedhore dhe lista e Qendrave të Numërimit;
Rekomandimi për ndërrimin e lokacionit të një qendre votimi në Komunën e Shtimes;
Procedura e votimit për persona me nevoja të veçanta;
Zëvendësimi i anëtarëve të Kuvendeve Komunale në Ferizaj, Gjakovë dhe Podujevë.
KQZ njoftoi se përgatitjet për procesin zgjedhor po vazhdojnë sipas planifikimit.
