Një rast i rëndë i dhunës në familje është raportuar më 29 nëntor në Fushë Kosovë, ku një grua është therur me thikë nga i fejuari i saj, i cili njëkohësisht është pjesëtar i Forcës së Sigurisë së Kosovës.
FSK ka konfirmuar se i dyshuari është pjesë e trupës së saj dhe aktualisht ndodhet në ndalim policor. Institucioni ka bërë të ditur se është njoftuar për ngjarjen dhe do të ndërmarrë të gjitha veprimet e nevojshme sipas akteve ligjore dhe rregulloreve në fuqi.
Sipas raportit 24-orësh të Policisë së Kosovës, njësitë policore kanë dalë menjëherë në vendin e ngjarjes, ku kanë gjetur viktimën me lëndime të shkaktuara nga mjeti i mprehtë. Ajo është trajtuar fillimisht në QKMF dhe më pas është dërguar në QKUK, ku është operuar për shkak të gjendjes kritike.
Policia ka bërë të ditur se i dyshuari është arrestuar nën dyshimin për tentim-vrasje. Në vendin e ngjarjes është gjetur dhe konfiskuar edhe thika që dyshohet të jetë përdorur në sulm.
Prokuroria Themelore në Prishtinë njoftoi se ka kërkuar masën e paraburgimit për të dyshuarin, duke e hetuar për veprën penale “Vrasje e rëndë në tentativë”.
Ndërkohë, është bërë e ditur se, pas pesë ditësh në Mjekim Intensiv, gjendja e viktimës është stabilizuar dhe ajo është transferuar në repartin e Kirurgjisë Abdominale.
Hetimet për zbardhjen e plotë të rastit janë ende në vazhdim.
