Kryeministri në detyrë i Kosovës, Albin Kurti, ka reaguar pas caktimit të datës së zgjedhjeve të parakohshme parlamentare, duke e mirëpritur vendimin e Presidentes Vjosa Osmani që votimet të mbahen më 28 dhjetor.
Kurti ka thënë se dita e zgjedhjeve është “festë e demokracisë”, e cila bëhet edhe më madhështore kur qytetarët marrin pjesë sa më masivisht në votim.
“Dita e zgjedhjeve është festë e demokracisë. Ajo bëhet edhe më madhështore kur ka pjesëmarrje sa më të madhe të qytetarëve tanë me të drejtë vote”, ka deklaruar ai.
Kryeministri në detyrë ka theksuar se është e domosdoshme që institucionet shtetërore të kenë kohën e mjaftueshme për përgatitjet e nevojshme, në mënyrë që procesi zgjedhor të zhvillohet drejt, rregullisht dhe në mënyrë demokratike.
“Në të njëjtën kohë, duhet të sigurohemi që institucionet shtetërore kanë kohën e mjaftueshme për të bërë të gjitha përgatitjet e nevojshme që procesi zgjedhor të jetë i rregullt, i drejtë dhe demokratik”, u shpreh Kurti.
Ai tha se 28 dhjetori është data më e përshtatshme për mbajtjen e zgjedhjeve të parakohshme.
“Andaj, ne e mirëpresim caktimin e datës 28 dhjetor nga Presidentja e vendit, Vjosa Osmani-Sadriu, si datën më të përshtatshme për zgjedhjet e parakohshme që po na presin”, përfundoi Kurti.
Postimi i plotë:
Dita e zgjedhjeve është festë e demokracisë. Ajo bëhet edhe më madhështore kur ka pjesëmarrje sa më të madhe të qytetarëve tanë me të drejtë vote. Në të njëjtën kohë, duhet të sigurohemi që institucionet shtetërore kanë kohën e mjaftueshme për të bërë të gjitha përgatitjet e nevojshme që procesi zgjedhor të jetë i rregullt, i drejtë dhe demokratik. Andaj, ne e mirëpresim caktimin e datës 28 dhjetor nga Presidentja e vendit, Vjosa Osmani-Sadriu, si datën më të përshtatshme për zgjedhjet e parakohshme që po na presin.
