Pas shkarkimit të Besim Kelmendit nga pozita e ushtruesit të detyrës së Kryeprokurorit të Shtetit, në një konferencë për medie, Visar Krasniqi- anëtar i Këshillit Prokurorial të Kosovës (KPK), ka thënë se nuk ka pasur njoftim për vazhdimin e mbledhjes.
Në mbledhjen e Këshillit Prokurorial të Kosovës (KPK) të enjten, Kelmendi u shkarkua nga kjo pozitë me votat e pesë anëtarëve të Këshillit, pasi të tjerët kishin lëshuar mbledhjen, raporton “Betimi për Drejtësi“.
Sipas Krasniqit, çdo akt i marrë në këtë mbledhje e cila është konsttauar se nuk ka kuorum, është akt inekzistent.
“Nuk kemi pas njoftim për vazhdimin e mbledhjes për të cilën ai vetë konstatoi se nuk ka kuorum për të vazhduar tutje. Çdo vendim i marrë në mungesë korumi është akt inekzistent dhe nuk prodhon kurrfarë efekti juridik. Largimi ka qenë vetëm mekanizëm i mbështetur i pesë anëtarëve për ta ndaluar një akt të paligjshëm”, tha Krasniqi.
Në konferencë po marrin pjesë vetë Kelmendi dhe anëtarët: Visar Krasniqi, Arian Gashi, Veton Shabani dhe Dardan Vuniqi.
Pas vendimit për shkarkim, Kelmendi i kontaktuar nga “Betimi për Drejtësi” tha se nga mediat është informuar për vendimin për shkarkimin e tij.
“Për besë, u informova nga mediat për shkarkimin tim. Është vendim arbitrar, vendim i kundërligjshëm sepse dihet fare mirë që KPK s’ka pas kuorum. Posa ta pranoj një vendim të tillë, natyrisht se do ta atakoj në gjykatë”, tha Kelmendi.
Në anën tjetër, KPK në këtë takim pa kuorum, po ashtu ka caktuar si ushtrues detyre të Kryeprokurorit të Shtetit, prokurorin Agron Qalaj. Ky i fundit, i kontaktuar nga “Betimi për Drejtësi”, tha se nuk e ka idenë se çfarë ka ndodhur në KPK.
“Kush more… Sen nuk di çka ka vendos Këshilli”, tha Qalaj.
Lidhur me këtë vendim, Instituti i Kosovës për Drejtësi (IKD) ka reaguar ashpër ndaj vendimit të Këshillit, duke e quajtur të paligjshëm, arbitrar dhe abuziv këtë vendim të një pjese të anëtarëve të Këshillit Prokurorial të Kosovës (KPK), të cilët, në mungesë të kuorumit për vendimmarrje, kanë nxjerrë vendim për shkarkimin e Ushtruesit të Detyrës së Kryeprokurorit të Shtetit, Besim Kelmendi. Ky vendim vjen me fillimin e zbatimit dhe efekteve të para të reformës në KPK që synon ta luftojë korporatizmin brenda këtij institucioni.
“Vendimi për shkarkimin e z. Kelmendi është përpjekje për të ruajtur përbërjen korporatiste dhe kontrollin e sistemit prokurorial nga grupi i stërvjetëruar i interesit brenda sistemit prokurorial”, thuhet në reagim.
