Ministri i Jashtëm i Malit të Zi, Ervin Ibrahimoviq, ka deklaruar se vendimi për pezullimin e përkohshëm të udhëtimit pa viza mes Turqisë dhe Malit të Zi pritet të anulohet shumë shpejt, brenda 10 deri në 15 ditëve, raporton NTV, transmeton KosovaNews.
Ibrahimoviq e bëri këtë prononcim gjatë një konference të përbashkët për media me ministrin gjerman të Punëve të Jashtme, Johann Wadephul, i cili po qëndron për vizitë zyrtare në Podgoricë.
Ai tha se është në komunikim të vazhdueshëm me kryeministrin Milojko Spajiq dhe se pret që marrëveshja e udhëtimit pa viza t’i rikthehet normalitetit.
“Jam në kontakt të rregullt me kryeministrin. Besoj se vendimi për pezullimin e udhëtimit pa viza me Turqinë do të anulohet brenda 10–15 ditësh,” deklaroi ai.
Ministri malazez shtoi se pas pezullimit të kësaj marrëveshjeje, është shkaktuar fluks i madh i qytetarëve turq në përfaqësitë diplomatike të Malit të Zi në Turqi.
Çfarë kishte ndodhur në Mal të Zi?
Vendimi për pezullimin e udhëtimit pa viza erdhi pas një rasti të thikësimit në Podgoricë në fund të tetorit, për të cilin fillimisht u akuzuan dy shtetas turq. Pas incidentit, grupe qytetarësh malazezë organizuan përmes rrjeteve sociale sulme ndaj bizneseve dhe automjeteve në pronësi të turqve.
Si reagim ndaj tensioneve, kryeministri Milojko Spajiq njoftoi se liria e udhëtimit pa viza për shtetasit turq do të pezullohej përkohësisht.
Dy turq të arrestuar — të pafajshëm
Të dy shtetasit turq të arrestuar, me inicialet Y.G. dhe N.D., të dyshuar fillimisht për “tentativë vrasjeje”, janë liruar pasi hetimet kanë vërtetuar se nuk kanë qenë të përfshirë në incident.
Gjykata e Lartë në Podgoricë njoftoi se nuk ka pasur dyshime të arsyeshme që i ndërlidhnin ata me rastin, duke theksuar se vendimi për lirimin e tyre nuk lidhet me ndryshimin e kualifikimit të veprës penale, por me mungesën e provave që të mbështesin akuzën./KosovaNews/
