Ministri në detyrë i Punëve të Brendshme, Xhelal Sveçla, ka reaguar pas një gjetjeje të rrezikshme të bërë nga Policia e Kosovës dhe forcat e KFOR-it në veri të vendit. Ai ka deklaruar se Serbia, përmes grupeve kriminale dhe terroriste, vazhdon të planifikojë sulme ndaj Republikës së Kosovës, transmeton KosovaNews.
Sveçla ka njoftuar se dje, në afërsi të fshatit Gnjezhdan në Leposaviq, janë gjetur dhjetë detonatorë ndezës me fitila (kabllo), të cilët sipas tij do të përdoreshin për sulme terroriste.
“Serbia përmes bandave kriminale e terroriste vazhdon ende të planifikojë e ndërmarrë sulme terroriste në Republikën e Kosovës. Dje Policia e Kosovës së bashku me KFOR-in kanë gjetur dhjetë detonator ndezës me fitila në Leposaviq”, ka shkruar ai.
Sipas ministrit, prania dhe shtrirja e Policisë së Kosovës në veri po pamundëson veprimet e tilla duke neutralizuar rreziqet në kohë.
Lexo po ashtu:
“Prania e institucioneve tona të sigurisë ka bërë të mundur që mjete të tilla, që do të përktheheshin në sulme të rrezikshme, të kapen dhe të shmangen, duke minimizuar rastet që synojnë krijimin e pasigurisë dhe frikësimin e qytetarëve,” ka deklaruar Sveçla.
Ai theksoi se Kosova nuk do të tërhiqet nga lufta kundër krimit të organizuar dhe kërcënimeve terroriste.
“Nuk ka kthim mbrapa. Policia e Kosovës, institucionet e sigurisë dhe Republika e Kosovës janë të vendosura në përballjen me bandat kriminale. Kushtetushmëria, ligjshmëria dhe drejtësia do të ngadhnjejnë mbi çdo celulë terroriste e mafioze,” përfundoi ai.
Autoritetet e sigurisë nuk kanë dhënë detaje shtesë për hetimet, por rasti konsiderohet një prej kapjeve më serioze të mjeteve shpërthyese në muajt e fundit në veri të vendit./KosovaNews/
