Spitali i Përgjithshëm i Prizrenit po hyn në një fazë të re zhvillimi nën drejtimin e drejtorit të ri, Osman Hajdari, i cili ka njoftuar për një projekt transformues me vlerë rreth 3 milionë euro, raporton KosovaNews.
Ky investim i madh po mundëson rikonstruktimin e plotë të Reparteve Pediatrike dhe Internistike, duke e kthyer objektin e ndërtuar në vitet ’70-ta në një hapësirë moderne, funksionale dhe të denjë për nevojat e pacientëve.
Projekti po realizohet me mbështetje të plotë nga SHSKUK dhe Ministria e Shëndetësisë (MSH), dhe përfshin katër kate me rreth 4,200 metra katrorë hapësirë, ku po modernizohen të gjitha sistemet teknike, dhomat e pacientëve, ambientet e punës dhe po krijohen njësi intensive të reja pediatrike dhe internistike.
“Me këtë projekt po ndërtojmë jo vetëm mure të reja, por edhe besim të ri tek shërbimi publik shëndetësor,” ka deklaruar drejtori Osman Hajdari, duke theksuar se ky investim shënon fillimin e një epoke të re për Spitalin e Prizrenit.
Nën drejtimin e tij, spitali po synon standarde të reja të kujdesit mjekësor, me infrastrukturë moderne, aparatura të avancuara dhe përkushtim maksimal për pacientët.
Ky projekt pritet të jetë një nga investimet më të rëndësishme në sistemin shëndetësor rajonal, duke vendosur Spitalin e Prizrenit në nivelin e institucioneve bashkëkohore të shërbimit publik.
