Këshilli i Përgjithshëm i Lëvizjes Vetëvendosje do të mblidhet sot në orën 12:00, ku në rend dite është votimi i mandatarit për kryeministër.
Mbledhja vjen një javë pasi kabineti i propozuar nga Albin Kurti për Qeverinë “Kurti III” nuk mori votat e nevojshme në Kuvend, duke siguruar vetëm 56 vota nga 61 sa kërkohen për shumicën e thjeshtë.
Pas rrëzimit të kabinetit, partitë ish-opozitare kanë bërë të ditur se nuk do të kërkojnë mandatar për formimin e qeverisë, duke kërkuar në vend të kësaj shpalljen e zgjedhjeve të reja.
Presidentja e Kosovës, Vjosa Osmani, zhvilloi një takim me liderët e partive politike, por pa arritur ndonjë marrëveshje për hapat e mëtejshëm. Gjatë takimit, Kurti raportohet se ka kërkuar mundësinë për të provuar edhe një herë formimin e qeverisë.
Nga Lëvizja Vetëvendosje është deklaruar se nuk kanë kandidat tjetër për mandatar përveç Albin Kurtit. Megjithatë, disa njohës të Kushtetutës kanë vlerësuar se Kushtetuta nuk e lejon që Kurti të propozohet sërish në këtë fazë.
Sipas afateve ligjore, Lëvizja Vetëvendosje ka edhe një ditë kohë për të vendosur nëse do të propozojë kandidat të ri për kryeministër apo nëse vendi do të shkojë drejt zgjedhjeve të jashtëzakonshme.
Ndërkohë, sot Kurti ka zhvilluar një takim me presidenten Vjosa Osmani, por deri tani nuk janë dhënë detaje për përmbajtjen e takimit.
Deputeti i Vetëvendosjes, Enver Dugolli, ka mohuar mundësinë e ndonjë emri të ri për mandatar. “Jo, nuk kemi ndonjë emër ose opsion tjetër për mandatar. Ne e kemi pasur Kurtin dhe nuk kemi thirrur ndonjë mbledhje të Këshillit të Përgjithshëm, prandaj nuk do të ketë emër tjetër për mandatar”, ka deklaruar ai në TeVe1.
