Kryetari i Nismës Socialdemokrate, Fatmir Limaj, ka bërë të ditur se në takimin e zhvilluar me presidenten e vendit, Vjosa Osmani, është diskutuar ideja që presidenti i Kosovës në të ardhmen të zgjidhet drejtpërdrejt nga qytetarët.
Në një intervistë televizive, Limaj tha se një ndryshim i tillë do të kërkonte ndërhyrje në Kushtetutë, pasi aktualisht presidenti zgjidhet nga Kuvendi me dy të tretat e votave të deputetëve.
“Ishte një bashkëbisedim për mënyrën se si mund t’i shmangim krizat politike. Një nga idetë që u përmend ishte që presidenti të zgjidhet me vota të qytetarëve, për të shmangur situatat kur Kuvendi nuk arrin të sigurojë shumicën e nevojshme”, tha Limaj.
Sipas tij, diskutimi ishte i lirë dhe pa ndonjë propozim konkret, por kishte për qëllim të trajtonte mënyrat për të shmangur bllokadat institucionale që përsëriten në Kosovë.
Limaj po ashtu theksoi se ka pritur që presidentja Osmani të shpallë menjëherë shpërndarjen e Kuvendit pas takimit të partive politike.
“Kam pritur që presidentja menjëherë ta nxjerrë dekretin për shpërndarjen e Kuvendit dhe të shpallë zgjedhjet e jashtëzakonshme, pasi tashmë është e qartë se nuk ka mundësi për krijimin e një shumice të re parlamentare,” deklaroi ai.
I pyetur se pse nuk ndodhi kjo, Limaj tha se kryetari i Lëvizjes Vetëvendosje, Albin Kurti, ka kërkuar disa ditë kohë.
“Kryetari i partisë më të madhe kërkoi dy deri në tri ditë kohë,” shtoi Limaj.
