Gjatë muajit tetor, shumë ngjarje të çuditshme u raportuan në media që nga policia në New Jersey që kërkonte majmunët në imazhe për të cilët thuhet se ishin gjeneruar nga inteligjenca artificiale e deri te vjedhja e kukullave të koleksionueshme Labubu me vlerë 9.000 dollarë në Australi, raporton Anadolu.
Krahas zhvillimeve të shumta politike në të gjithë botën, ngjarje të pazakonta dhe “të çuditshme” ndodhën në vende të ndryshme, ndonjëherë të habitshme dhe ndonjëherë zbavitëse. Në kuadër të kësaj, gazetari i AA-së përpiloi një listë të ngjarjeve interesante të regjistruara në të gjithë botën në tetor.
– Imazhet e majmunëve në rrugët e Newark-ut mund të jenë gjeneruar nga inteligjenca artificiale
Ndikimi i përmbajtjeve të gjeneruara nga inteligjenca artificiale në jetën e përditshme vazhdon të jetë temë diskutimi. Videot e shpërndara shpesh në mediat sociale në Newark, New Jersey, në tetor treguan majmunë që endeshin nëpër rrugë.
Drejtori i Sigurisë Publike në Newark, Emmanuel Miranda tha se policia filloi të ndiqte “majmunët” që thuhet se u panë në rrugë pas raportimeve. Ai theksoi se oficerët që u mobilizuan për të kapur majmunët, nuk mundën t’i gjurmonin këto kafshë.
Miranda shtoi se autoritetet nuk mundën t’i gjenin majmunët dhe arritën në përfundimin se videot që qarkullonin në mediat sociale me shumë mundësi mund të ishin prodhuar me inteligjencë artificiale.
– Një person në Australi u akuzua për vjedhjen e kukullës koleksionuese Labubu me vlerë 9.000 dollarë
Policia në qytetin Melburn të Australisë, në tetor kreu një operacion në zonën e Aeroportit Perëndimor në perëndim të Melburnit. Gjatë operacionit, policia sekuestroi 43 kukulla koleksionuese Labubu, me vlerë rreth 9.000 dollarë dhe arrestoi burrin 40-vjeçar të akuzuar për vjedhjen e kukullave me akuzën e vjedhjes dhe posedimit të mallrave të vjedhura.
Policia deklaroi se disa nga 43 kukullat e vjedhura ishin pjesë e një koleksioni me edicion të kufizuar me vlerë prej 500 dollarësh. Nga gjykata në të cilën u paraqit për gjykim, personi i arrestuar u lirua me kusht për t’u gjykuar nga Gjykata e Magjistraturës së Melburnit në maj 2026.
Që nga paraqitja e tyre në treg në vitin 2015 e deri më tani, kukullat Labubu të dizajnuara nga artisti i Hong Kongut, Kasing Lung, kanë tërhequr vëmendje të madhe kohët e fundit. Fillimisht të shitura për rreth 30 dollarë, kukullat mund të shiten me qindra, madje mijëra dollarë.
– Në Spanjë u kapën hajdutët që vodhën karrige me vlerë 60 mijë euro
Në tetor në media u pasqyrua një ngjarje interesante që ndodhi në kryeqytetin e Spanjës, Madri, dhe rajonin pranë tij Talavera de la Reina. Policia njoftoi se një grup prej shtatë personash vodhën karrige të cilat ishin lënë në rrugë gjatë natës nga 18 restorante të ndryshme dhe biznese të ngjashme në zonë.
Policia tha se më shumë se 1.100 karriget e vjedhura nga hajdutët, kishin një vlerë prej rreth 60 mijë eurosh dhe se u arrestuan shtatë të dyshuar. Shumë biznese në Spanjë, karriget dhe tavolinat e tyre zakonisht të bëra prej metali ose plastike të fortë, i sigurojnë me zinxhirë ose pajisje të ngjashme dhe i lënë në rrugë gjatë natës.
– Majmuni që iku nga pronari i tij u kap falë një filxhani kafeje
Një majmun merimangë me emrin “Ava” iku nga pronari i tij gjatë pjesëmarrje në një festival vjeshte në qytetin Eutawville në Karolinën e Jugut në SHBA. Autoritetet e qytetit filluan të kërkojnë primatin pasi mësuan se majmuni, i cili i ishte larguar nga pronari i tij, po endej përreth.
Majmuni merimangë, i cili u gjet shpejt, refuzonte t’u afrohej njerëzve. Megjithatë, autoritetet u përpoqën të tërhiqnin vëmendjen e primatit duke lënë një filxhan kafe në tokë. Më pas kur majmuni merimangë me emrin “Ava” iu afrua për të vëzhguar kafenë, autoritetet arritën ta kapnin majmunin dhe t’ia kthenin pronarit të tij./AA/
