Mungesa e institucioneve funksionale në Kosovë po shihet në Bruksel si pengesë për rrugëtimin e vendit drejt strukturave evropiane dhe rrjedhimisht edhe për mundësinë e vazhdimit të procesit të heqjes së masave.
Në një konferencë kushtuar zgjerimit, drejtori i përgjithshëm për Zgjerimin në Komisionin Evropian rikujtoi se në Kosovë nuk ka qeveri që nga muaji shkurt. Ai përmendi rastet e Shqipërisë dhe Malit të Zi, të cilat, sipas tij, janë plotësisht të përqendruara në proceset e integrimit evropian, duke këshilluar autoritetet kosovare të ndjekin të njëjtin shembull
“Këshilla ime për vendin është që të përqendrohet në këtë drejtim, sepse nëse nuk është plotësisht i angazhuar, është e vështirë të ecet përpara. Ne, në Komision, jemi në proces të heqjes së masave pas një diskutimi shumë të vështirë në Këshillin e BE-së vitin e kaluar. Ne do të ishim të gatshëm, natyrisht, të përgatisim një mendim mbi aplikimin për anëtarësim të Kosovës, por për këtë Këshilli duhet të na ftojë dhe mendoj se duhet të ketë një reflektim edhe në Kosovë pse Këshilli nuk po e bën këtë gjë”, tha Gert Jan Koopman, drejtor i përgjithshëm për Zgjerimin në Komisionin Evropian.
Ambasadori i Kosovës në Belgjikë, Agron Bajrami, kujtoi se Kosova nuk mund të trajtohet si vend pa qeveri, ndonëse ajo është me mandat të kufizuar. Ai theksoi se, përkundër shumë hapave të ndërmarrë, masat ndëshkuese ndaj Kosovës ende mbeten në fuqi.
“Këto masa nuk ishin përgjigje ndaj ndonjë regresi të Kosovës në proceset demokratike. Duhet t’ua kujtoj të gjithëve se këto masa erdhën pas një situate të veçantë në veri, e cila, nga perspektiva jonë, kishte të bënte me zbatimin e sundimit të ligjit dhe sigurimin që institucionet po ruajnë rendin kushtetues”, theksoi ai,
Ndërkohë, disa ditë më parë Bashkimi Evropian konfirmoi se mbarëvajtja e zgjedhjeve lokale në vend po shihet si një sinjal pozitiv drejt heqjes së masave. Megjithatë, porosia nga institucionet evropiane mbetet e pandryshuar: fillimisht duhet të ndodhë bartja e pushtetit lokal, në mënyrë që të merret në konsideratë vazhdimi i procesit të heqjes së masave.
Për momentin, BE-ja ka larguar vetëm disa masa simbolike./rtk/
