Policia e Kosovës ka njoftuar për tre raste të ndara të vdekjes që kanë ndodhur në Fushë Kosovë, Lipjan dhe Ferizaj.
Në rrugën “Agron Rrahmani” në Fushë Kosovë është raportuar se person ka humbur jetën pasi ka rënë nga një lartësi prej rreth tre metrash në një objekt në ndërtim, në hapësirën e paraparë për vendosjen e liftit. Njësitë përkatëse të policisë kanë dalë në vendin e ngjarjes dhe me vendim të prokurorit trupi i pajetë është dërguar në Institutin e Mjekësisë Ligjore për obduksion.
Policia ka njoftuar se në Aeroportin Ndërkombëtar “Adem Jashari” në Lipjan, është raportuar se një shtetas zviceran ka ndërruar jetë pasi i është përkeqësuar gjendja shëndetësore ndërsa po priste të udhëtonte për në Zvicër. Pavarësisht ndihmës mjekësore që i është ofruar në vendngjarje, ai nuk ka arritur të mbijetojë. Edhe në këtë rast, me urdhër të prokurorit, trupi i pajetë është dërguar në IML për obduksion.
Ndërkaq, në fshatin Rakaj të Ferizajt, grua fillimisht është dërguar në Emergjencën e Ferizajt e më pas në QKUK në Prishtinë, ku edhe ka ndërruar jetë. Me vendim të prokurorit, trupi i pajetë është liruar familjarëve.
Policia ka njoftuar se në të gjitha rastet është iniciuar hetim për zbardhjen e rrethanave të vdekjeve.
