Lëvizja Vetëvendosje ka mbajtur takimin përmbyllës në Kamenicë, ku kërkoi votën e qytetarëve për të qeverisur edhe për një mandat me këtë komunë. Kreu i këtij subjekti, Albin Kurti, tha se Kadri Rahimaj ka qenë shembull i qeverisjes së mirë, ndërsa premtoi se projekte të rëndësishme do të jetësohen me LVV-në në krye të Kamenicës.
“Projekti kryesor i mandatit të ardhshëm është rruga me 4 korsi Kamenicë- autostradë që e nxjerr komunën nga izolimi dhe hap rrugën për investime. Fermerët do të kenë qasje më të lehtë në tregje, qytetarët në lëvizje të lirë dhe sigurt. Ngado që shkoj Kadriun e marr si shembull pasi ai ka dhënë shtesë nga çfarë jep Ministria e Bujqësisë për blegtorët. Tani janë 85 blegtorë. Si qeverisje e Vetëvendosjes kemi investuar më së shumti në bujqësi dhe ushtri. Në të dyja mbi 300 milionë euro”, ka deklaruar Kurti.
Ndërsa Kadri Rahimaj që garon edhe për një mandat, premtoi investime në infrastrukturë, shkolla të sigurta e moderne, shërbime të reja për shëndetësinë, grante për bizneset e projekte tjera.
“Ne nuk po luftojmë për poste, ne po luftojmë për njerëzit. Për baballarët që nuk duan t’i dërgojnë fëmijët në kurbet. Për vajzat që mësojnë në parkun teknologjik, për të moshuarit që marrin barnat falas, për nënat që e lënë fëmijën në çerdhe me zemër të qetë e për ndërmarrësinë. Kamenica është një qytet, një familje. Dhe për familjen ne punojmë pa orar, punojmë me shpirt. Më 12 tetor ose i japim krah zhvillimit ose kthehemi në kohën e harresës. Zhvillimin e investimin nuk e ndalim për Kamenicën. Jo pengesa, jo propaganda e as viktimizim. Pragun tonë të dytë e ka përcaktuar numri 105. Të bëhemi gati të mbërrijmë 105 milionë euro investime për Kamenicën në mandatin e dytë. Qytetarë me votën tuaj vendosni që fëmijët të kenë më shumë mundësi dhe Kamenica më shumë zhvillim e besim”, ka shtuar ai.
Sipas Vetëvendosjes, më 12 tetor fitorja në Kamenicë do të jetë e thellë dhe e sigurt.
