Presidenti i Serbisë, Aleksandar Vuçiq, tha se Shtetet e Bashkuara do të vendosin sanksionet ndaj Industrisë së Naftës së Serbisë (NIS) më 1 tetor, pasi shtyrja e fundit përfundon më 26 shtator.
SHBA e kishte futur kompaninë më të madhe të naftës në Serbi në listën e sanksioneve më 10 janar, për shkak të lidhjeve të saj me pronarë rusë dhe si pasojë e pushtimit rus të Ukrainës. Deri më tani, sanksionet janë shtyrë gjashtë herë.
“Ne kemi qenë korrektë si ndaj partnerëve rusë, ashtu edhe ndaj amerikanëve, por njerëzit duhet ta dinë se do të paguajmë një çmim shumë të lartë,” tha Vuçiq në një deklaratë për mediat serbe nga Nju Jorku, ku po merr pjesë në Asamblenë e Përgjithshme të OKB-së. Ai e cilësoi Serbinë si “dëm kolateral i marrëdhënieve midis amerikanëve dhe rusëve” dhe paralajmëroi “kohë të vështira dhe një dimër të ashpër”.
NIS ka ndryshuar disa herë strukturën e pronësisë. Në shtator, Gazprom u largua nga lista e pronarëve, ndërsa 11.3% e aksioneve kaluan tek kompania ruse Intelidzhens nga Shën Petersburgu. Pjesa më e madhe e aksioneve (44.9%) vazhdon të mbahet nga Gazprom Neft, ndërsa shteti serb zotëron 29.9%.
Vuçiq në janar e kishte përjashtuar nacionalizimin e kompanisë, duke thënë se Serbia nuk do të konfiskojë pronë ruse. Ndërkohë, NIS raportoi humbje prej 30 milionë eurosh në gjysmën e parë të vitit, për shkak të sanksioneve dhe rënies së çmimit të naftës.
