Koalicioni i Organizatave për Mbrojtjen e Fëmijëve (KOMF) i është drejtuar Ministrisë së Arsimit, Shkencës, Teknologjisë dhe Inovacionit me kërkesën që edhe fëmijët me aftësi të kufizuara të përfshihen në Programin e Kuponëve, i cili pritet të zbatohet deri në qershor të vitit 2028.
KOMF vlerëson se kjo nismë e ministrisë është një hap pozitiv drejt barazisë sociale dhe mbështetjes së familjeve në nevojë, por shpreh shqetësimin për mos-përfshirjen e fëmijëve me aftësi të kufizuara, të cilët tashmë përballen me barriera të shumta për qasje në edukimin në fëmijërinë e hershme.
Sipas organizatës, përfshirja e këtyre fëmijëve në institucione, sidomos private, është shumë e ulët për shkak të kostove të larta që prindërit duhet të mbulojnë. Familjet shpesh paguajnë shuma që arrijnë deri në 600–700 euro në muaj për kopshtin privat, pagesën e asistentëve dhe shërbimet profesionale rehabilituese si psikologë, logopedë, fizioterapeutë e të tjera.
KOMF kujton se, sipas Udhëzimit Administrativ Nr. 03/2022, fëmijët nga grupet e rrezikuara, përfshirë ata me nevoja të veçanta, duhet të lirohen nga pagesat për institucionet parashkollore. Duke u bazuar në këtë, organizata kërkon që kuponët për këta fëmijë të jenë me vlerë më të lartë, në mënyrë që të mbulojnë edhe nevojat shtesë profesionale për përfshirjen efektive të tyre në edukim.
Sipas KOMF-it, një qasje e tillë do të:
Sigurojë përfshirjen e fëmijëve me aftësi të kufizuara në edukimin e hershëm.
Lehtësojë barrën financiare të prindërve.
Përmbush obligimet kushtetuese dhe ligjore të Kosovës në raport me Konventën për të Drejt Fëmijës.
