Departamenti i Shtetit i SHBA-së ka publikuar Raportin e Transparencës Fiskale për vitin 2025, ku Kosova dhe Shqipëria renditen në mesin e vendeve që plotësojnë kriteret minimale të transparencës fiskale.
Sipas raportit, nga gjithsej 139 shtete dhe autoritete të analizuara, 71 vende kanë përmbushur standardet minimale, ndërsa 69 të tjera nuk i kanë arritur ato, transmeton KosovaNews.
Në listën e vendeve që i kanë përmbushur kriteret, përveç Kosovës dhe Shqipërisë, përfshihen edhe shtete si Kroacia, Maqedonia e Veriut, Serbia, Mali i Zi dhe Bosnja e Hercegovina. Kjo tregon, sipas raportit, një progres rajonal në drejtim të qeverisjes së mirë dhe menaxhimit të financave publike.
Raporti thekson se transparenca fiskale është element kyç për menaxhimin efektiv të financave publike, uljen e rrezikut nga korrupsioni, rritjen e besimit në tregje dhe fuqizimin e llogaridhënies së qeverive para qytetarëve.
Ndërkohë, disa shtete të tjera si Afganistani, Egjipti, Iraku, Nigeria, Ukraina dhe shumë vende të Afrikës, sipas raportit, nuk kanë arritur të përmbushin kriteret e përcaktuara.
Raporti i Departamentit të Shtetit mbulon periudhën 1 janar – 31 dhjetor 2024, duke analizuar qasjen në dokumentet buxhetore, pavarësinë e institucioneve të auditimit, publikimin e kontratave të prokurimit dhe transparencën në menaxhimin e burimeve natyrore.
Ky vlerësim për Kosovën dhe Shqipërinë shihet si një sinjal pozitiv për institucionet shtetërore dhe për përpjekjet e tyre në rritjen e llogaridhënies financiare./KosovaNews/
